Ghazal

aag ke safar mein jab raakh kaa badan hogaa

ek saans lenaa bhi zindagi kaa fan hogaa

jo bhi main ne sochaa thaa vo hi ab ke likkhaa hai

tang aur bhi ab ke halqa-e-rasan hogaa

· · ·

hisaar mein liye be-naam ek vahshat thi

yahi mataa' yahi zindagi ki qimat thi

kahin qiyaam bhi karte to bad-gumaan rahte

hamaare pair se lipTi hui vo hijrat thi

· · ·

koi baDh kar sitam mujh par sitam-ijaad kyaa kartaa

basaayaa hi nahin jis ko use barbaad kyaa kartaa

sikhaayaa bolnaa us ko zabaan-e-be-zabaani se

agar lab khol leti main vo phir irshaad kyaa kartaa

· · ·

qalam ko khuun mein gharqaab dekhte jaao

zamin-e-sher ko shaadaab dekhte jaao

nigaah hote hue sail-e-khun pe chup rahnaa

hamaare shahr ke aadaab dekhte jaao

· · ·

‘uqde khule na mujh pe tire khad-o-khaal ke

har saans chal diyaa mujhe uljhan mein Daal ke

jo khud ganvaa chukaa hai kahin 'umr-e-mo'tabar

vo kyaa hisaab degaa mire maah-o-saal ke

· · ·

nadi ehsaas ki chaDhti rahi hai

vafaa ki raah mein baDhti rahi hai

kisi se jang kyaa laDki kare vo

jo apne aap se laDti rahi hai

· · ·

kisi khushi kaa mire dil ko e'tibaar na de

jo e'tibaar agar de to be-shumaar na de

rasan ho ruuh ko aur paanv ki bane zanjir

kisi nigaah ko ab mujh pe ikhtiyaar na de

· · ·

khud apni zaat ko pahle mujhe taskhir karnaa thaa

isi buniyaad par phir shahr-e-dil taa'mir karnaa thaa

hamein par bhi katarne the anaa ko dafn karnaa thaa

kisi ke naam ko phir paanv ki zanjir karnaa thaa

· · ·

har habs ke mausam mein guzar main ne kiyaa hai

aandhi mein diyaa le ke safar main ne kiyaa hai

Daalaa kahaan hathiyaar kabhi meri anaa ne

har jang mein is ko hi sipar main ne kiyaa hai

· · ·

tamaam 'umr vo ehsaan mujh pe kartaa rahaa

miri hi raakh se vo zakhm meraa bhartaa rahaa

talaash taa-ba-falak jis ki le gai mujh ko

vo jab milaa to mire baal-o-par katartaa rahaa

· · ·

us ne jaane ki kahi ho jaise

koi aandhi si chali ho jaise

aaj kuchh aisi thakan hai mujh ko

raat aankhon mein kaTi ho jaise

· · ·

ab ke hisaar-e-zaat se baahar nikal ke dekh

shahr-e-gulaab mein kabhi kaanTon pe chal ke dekh

jo bhi hai jaisaa us ko usi tarz se parakh

us ko badal ke dekh na khud ko badal ke dekh

· · ·

har ek harf ko ham paaemaal karte rahe

tamaam 'umr tujhi se savaal karte rahe

abhi jo jaan-e-rag-e-qalb par lagaa hi nahin

us ek zakhm kaa hi indimaal karte rahe

· · ·

saahil na koi ab ke miri dastaras mein thaa

tufaan kaun saa miri mauj-e-nafas mein thaa

majburiyon ke DhunDh ke laayaa thaa vo javaaz

mujh se bichhaDte vaqt magar pesh-o-pas mein thaa

· · ·

lab-e-furaat kahaan ham qiyaam karte hain

ki ham to tishna-labi ko salaam karte hain

chaDhaaein kis liye patthar pe phuul ki chaadar

burida laashon kaa jo ehtiraam karte hain

· · ·

kisi hijr kaa kisi qurb kaa koi silsila jo guzar gayaa

miri manzilon ki naved thaa vahi raasta jo guzar gayaa

kise vaqt thaa jise dekh kar koi sochtaa koi puchhtaa

vahi ek chhoTaa saa saaniha pas-e-vaaqi'a jo guzar gayaa

· · ·

hai dost koi yaa miraa qaatil koi to hai

khush huun ki meraa madd-e-muqaabil koi to hai

junhi main Duubi bhiiD kinaare pe lag gai

is laash ke liye chalo saahil koi to hai

· · ·

'ishq mein ham se mashaqqat nahin karni aai

jaise karte hain mohabbat nahin karni aai

aap ke haath pe ham haath bhi rakhte kaise

ham se to apni hi bai'at nahin karni aai

· · ·

main duniyaa dekh kar hairat-zada thi

so meri 'aql ki ye intihaa thi

main tufaanon mein kaise ghir gai huun

main gird-o-pesh se jab aashnaa thi

· · ·

bahaa ke basti ko matla' jo khul gayaa saain

qubul ho gai kahte ho vo du'aa saain

so itnaa habs baDhaayaa gayaa ki phir aakhir

charaagh de ke kharidi gai havaa saain

· · ·

khayaal-o-fikr ke sab mausamon mein rahti hai

miri nigaah ke vo aainon mein rahti hai

vo meri chhoTi si guDiyaa vo jaan se pyaari

vajud-e-zaat ki sab dhaDkanon mein rahti hai

· · ·