Ghazal

"aamaada rakkhein chashm-o-dil saamaan-e-hairaani karein kyaa jaaniye kis vaqt vo nazaara farmaani karein bahr-e-balaa hai mauj par qahr-e-qazaa hai auj par hain kaah-e-saamaan mustaid taa naa-gurezaani karein aai hai raat aisi dani hai har charaagh afsurdani ai dil bayaa ai dil bayaa kuchh shoala-saamaani karein haan haan dikhaaeinge zarur ham vahshat-e-dil kaa vafur pahle ye shahr-e-dasht-o-dar takmil-e-viraani karein ai aashiqaan ai aashiqaan aayaa hai amar-e-naa-gahaan jo log hain nazaara ju vo mashq-e-hairaani karein vo shama hai dar-e-taaq-e-dil raushan hain sab aafaaq-e-dil uftaadgaan-e-khaak uTho aflaak gardaani karein hai bas-ki tegh us ki ravaan kamyaab hain naa-kustagaan sab sarfaroshon se kaho chande faraavaani karein ik naasihaanaa arz hai dariyaaon par ye farz hai dil ki tarah har lahar mein tajdid-e-tughyaani karein aise gharon mein ahl-e-dil rahte nahin hain mustaqil tabdil ye divaar-o-dar uslub-e-viraani karein"

"maujud hain kitne hi tujh se bhi hasin kar ke jhuTlaa diyaa aankhon ko main dil pe yaqin kar ke jis chashm se rindon mein hu-haq hai usi ne to zaahid ko bhi rakkhaa hai mehraab-nashin kar ke kyaa us ki lataafat kaa ahvaal bayaan kijiye jo dil pe huaa zaahir aankhon ko nahin kar ke kuchh kam thaa balaa-e-jaan pe chehra ki uupar se aankhein bhi banaa laae ghaarat-gar-e-din kar ke aaine ke aage se ab uTh bhi chuko saahab kyaa kijiyegaa khud ko itnaa bhi hasin kar ke sau daagh hain siine mein vo daagh-e-judaai bhi dekho to zaraa hogaa un mein hi kahin kar ke is dil kaa to naqsha hi duniyaa ne badal Daalaa kuchh yaad hai rahtaa thaa vo bhi to yahin kar ke 'jaaved' vahaan tak to mushkil hai koi pahunche mangvaaiye qaasid bhi jibril-e-amin kar ke"

"kyaa puchhte ho shahr mein ghar aur hamaaraa rahne kaa hai andaaz idhar aur hamaaraa vo tegh na jaane kidhar uThti hai abhi to jhagDaa hai dil-e-sina-sipar aur hamaaraa jab hosh mein aae to use dekh bhi leinge filhaal hai andaaz-e-nazar aur hamaaraa ye mohr o nishaan tabl-o-alam khuub hai lekin baDh jaaegaa kuchh baar-e-safar aur hamaaraa dil aisaa makaan chhoD ke ye haal huaa hai yaani nigah-e-khaana-badar aur hamaaraa"

"magar vo diyaa hi nahin maan kar ke bahut ham ne dekhaa hai ji jaan kar ke kabhi dil ko bhi sair kar jaao saahab ye ghuncha bhi haigaa gulistaan kar ke nazar is saraape mein sau jaa se palTi zulekhaai yusufistaan kar ke vo jis roz niklein jag ujiyaarne ko ye dil bhi dikhaa laaiyo dhyaan kar ke janaab aap huur o malak honge lekin samajhiyegaa aashiq ko insaan kar ke tiri laala-zaari salaamat ki ham bhi khaDe hain koi ghuncha armaan kar ke masih o khizr sar-ba-kaf phir rahe hain koi us pe marnaa hai aasaan kar ke miri kisht-e-jaan par se guzraa hai 'jaaved' sahaab-e-junun zor-e-baaraan kar ke"

"mujh se baDaa hai meraa haal tujh se chhuTaa teraa khayaal chaar pahar ki hai ye raat aur judaai ke sau saal haath uThaa kar dil par se aankhon par rakkhaa rumaal nang hai takiyedaaron kaa paa-e-talab yaa dast-e-savaal man jo kahtaa hai mat sun yaa phir tan par miTTi Daal ujlaa ujlaa teraa ruup dhundle dhundle khadd-o-khaal sukh ki khaatir dukh mat bech jaal ke pichhe jaal na Daal raaj-singhaasan meraa dil aan biraaje hain jagpaal kis din ghar aayaa 'jaaved' kab paayaa hai us ko bahaal"

"kisi kaa dhyaan mah-e-nim-maah mein aayaa safar ki raat thi aur khvaab raah mein aayaa tulu-e-saaat-e-shab-khun hai aur meraa dil kisi sitaara-e-bad ki nigaah mein aayaa mah o sitaara se dil ki taraf chalaa vo javaan adu ki qaid se apni sipaah mein aayaa jihaad-e-gham mein koi sust zarb meri tarah giraft-e-maisara-e-ashk-o-aah mein aayaa sitaare Duub gae aur vo sitaara-gar thakan se chuur zamin ki panaah mein aayaa charaagh hai miri raaton kaa ek khvaab-e-visaal jo koi pal tiri chashm-e-siyaah mein aayaa dukhi dilon ki salaami qubul karte hue nazar jhukaae koi khaanqaah mein aayaa"

"thaa jaanib-e-dil subh-dam vo khush-khiraam aayaa huaa aadhaa qadam su-e-gurez aur nim-gaam aayaa huaa raqs aur paa-kubi karun laazim hai majzubi karun dekho to hai meraa sanam meraa imaam aayaa huaa dariyaa-e-darveshi ke beach tufaan-e-be-khveshi ke beach vo gauhar-e-sairaab vo saahab-maqaam aayaa huaa ai dil bataa ai chashm kah ye ru-e-dil-bar hi to hai yaa maah-e-charkh-haft mein baalaa-e-baam aayaa huaa hai zarra zarra par sadaa ahlav-va-sahlan marhabaa kyaa sar-zamin-e-dil pe hai vo aaj shaam aayaa huaa tujh par paDi ye ki chhuT ai chashm-e-hairaan kuchh to phuuT kyaa hadd-e-binaai mein hai vo ghaib-e-faam aayaa huaa larzaan hai dil mein raaz saa shoala qadim-aavaam saa yaa laala-e-khaamosh par rang-e-davaam aayaa huaa hai mausam-e-divaangi phir chaak ijaad miri lauTaa rahe hain pahle kaa khayyaat kaam aayaa huaa meri taraf se ai aziiz dil mein na rakhnaa koi chiiz phirte bhi dekhaa hai kahin saahab ghulaam aayaa huaa khurshid-saamaani tiri aur zarra-daamaani miri hai ajuba dekhne har khaas-o-aam aayaa huaa ik girdaaDi sahraa samet ik mauj uThi dariyaa samet duniyaa-e-khaak-o-aab mein thaa koi shaam aayaa huaa yak umr-raftaari ke saath yak maah-sayyaari ke saath yak charkh-e-davaari ke saath gardish mein jaam aayaa huaa sad-chashm bedaari ke saath sad-sina sarshaari ke saath sau sau tarah shahbaaz dil hai zer-e-daam aayaa huaa"

"koi jal mein khush hai koi jaal mein mast hain sab apne apne haal mein jaada-e-shamshir ho yaa farsh-e-gul farq kab aayaa hamaari chaal mein ek aansu se kami aa jaaegi ghaaliban dariyaaon ke iqbaal mein shola-e-sad-rang ki si kaifiyat tujh mein hai yaa tere khadd-o-khaal mein ek lamha meraa yaar-e-ghaar hai is musibat-gaah-e-maah-o-saal mein ye jo mere ji ko chain aataa nahin hind mein iraan mein bangaal mein roz kaa ronaa lagaa hai apne saath ham ne aankhein baandh liin rumaal mein diida o dil ne kiyaa hai kaam band Thap hai kaarobaar is haDtaal mein is nigaah-e-naaz ki ek ek baat hai hamaare piir ke aqvaal mein dil pe saaya hai kisi sultaan kaa varna kyaa rakkhaa hai is kangaal mein"

"aansu ki tarah dida-e-pur-aab mein rahnaa har gaam mujhe khaana-e-sailaab mein rahnaa vo abru-e-khamdaar nazar aae to samjhe aankhon ki tarah saaya-e-mehraab mein rahnaa ghaflat hi mein kaTte hain shab-o-roz hamaare har aan kisi dhyaan kisi khvaab mein rahnaa din bhar kisi divaar ke saae mein tag-o-taaz shab justuju-e-chaadar-e-mahtaab mein rahnaa viraana-e-duniyaa mein guzarte hain mire din raaton ko ravaaq-e-dil-e-betaab mein rahnaa miTTi to har ik haal mein miTTi hi rahegi kyaa TaaT mein kyaa qaaqum o sanjaab mein rahnaa ghar aur bayaabaan mein koi farq nahin hai laazim hai magar ishq ke aadaab mein rahnaa ik pal ko bhi aankhein na lagin khaana-e-dil mein har lamha nigahbaani-e-asbaab mein rahnaa"

"sabaa dekh ik din idhar aan kar ke ye dil bhi paDaa hai gulistaan kar ke yahi dil jo ik buund hai bahr-e-gham ki Dubo degaa sab shahr tufaan kar ke miyaan dil ko is aaina-ru ke aage jo rakhnaa to yak-lakht hairaan kar ke khudaa jaane kyaa asliyat ghair ki hai dikhe hai bani-nau-e-insaan kar ke use ab raqibon mein paate hain aksar rakhaa jis ko khud se bhi anjaan kar ke dikhaa deinge achchhaa isi fasl-e-gul mein garebaan ko ham garebaan kar ke hamaare to ik ghar bhi hai bhaai majnun paDe hain usi ko bayaabaan kar ke"

"chaak karte hain garebaan is faraavaani se ham roz khilat paate hain darbaar-e-uryaani se ham muntakhab karte hain maidaan-e-shikast apne liye khaak par girte hain lekin auj-e-sultaani se ham ham zamin-e-qatl-gah par chalte hain siine ke bal jaada-e-shamshir sar karte hain peshaani se ham haan miyaan duniyaa ki cham-kham khuub hai apni jagah ik zaraa ghabraa gae hain dil ki viraani se ham zof hai had se ziyaada lekin is ke baavajud zindagi se haath uThaa sakte hain aasaani se ham dil se baahar aaj tak ham ne qadam rakkhaa nahin dekhne mein zaahiraa lagte hain sailaani se ham daulat-e-duniyaa kahaan rakkhein jagah bhi ho kahin bhar chuke hain apnaa ghar be-saaz-o-saamaani se ham zarra zarra jagmagaati jalva-baaraani-e-dost dekhte hain rauzan-e-divaar hairaani se ham aql vaalo khair jaane do nahin samjhoge tum jis jagah pahunche hain raah-e-chaak-daamaani se ham kaarobaar-e-zindagi se ji churaate hain sabhi jaise durveshi se tum maslan jahaanbaani se ham"

"aakhirul-amr tiri samt safar karte hain aaj is nakhl-e-masaafat ko shajar karte hain jo hai aabaad tiri aaina-saamaani se ham isi khaana-e-hairat mein basar karte hain dil to vo peT kaa halkaa hai ki bas kuchh na kaho apni haalat se kab aison ko khabar karte hain vasl aur hijr hain donon hi miyaan se baiat dekhiye kis pe inaayat ki nazar karte hain dil ne kuchh zor dikhaayaa to ye sunnaa ik din ham bhi alvand-e-gham-e-yaar ko sar karte hain tum ko to diin ki bhi fikr hai duniyaa ki bhi bhaai ham to yunhi bekaar basar karte hain"

"kitne mein banti hai mohr aisi naa-chiz ahmad-jaaved-'ovaisi' mere sukhan mein hai ek shai si aavaaz itni khaamoshi aisi kal aashiqon kaa aate hi mazkur kyaa kyaa na bahke allaama-qaisi is mantiqi par apni nazar hai min-vajh aisi min-vajh vaisi yaan kaa na honaa bhi vahm hi hai butlaan kis kaa tahqiq kaisi khulti nahin hai mujh par ye duniyaa dil mein nahin si aankhon mein hai si jitni masaafat sar kar chukaa huun lagti hai vo bhi naa-karda tai si sukhaa paDaa hai dariyaa to kab kaa hai mauj-khezi vaisi ki vaisi ab shahr saaraa gharqaab jaano ashkon mein aai ye buund kaisi saaghar milaa hai saaghar saa mujh ko us mein bhari hai mai koi mai si detaa hai tark-e-duniyaa ki daavat 'jaaved' ki to aisi-ki-taisi"

"hargiz na raah paai fardaa-o-di ne dil par rahti hai ek haalat baarah mahine dil par sakte mein hain mah-o-mehr dariyaa paDe hain be-bahr hai sakht ghair-mauzun duniyaa zamin-e-dil par shoala charaagh mein hai saudaa dimaagh mein hai saabit qadam huun ab tak din-e-mubin-e-dil par yaa-ayyohal-majaazib hai bas-ki zer-e-tartib majmuatul-fataavaa qaul-e-matin-e-dil par likh lo ye meri raae kyaa kyaa sitam na Dhaae kal dil ne aadmi par aaj aadmi ne dil par ye ranj naa-kashida ye jeb naa-darida ai ishq rahm haan rahm in taarkin-e-dil par maano ye ghar na chhoDo duniyaa ko dekhte ho jo kuchh guzar chuki hai is naa-makin-e-dil par ik sar hai naa-kashuda ik qaul naa-shanuda ik naghma naa-saruda tarz-e-navin-e-dil par paDtaa hai jasta jasta maddham saa aur shikasta ik maah-e-nilmin kaa partav nagin-e-dil par sau baar idhar se guzraa vo aatishin chaman saa ik barg-e-gul na rakkhaa dast-e-yamin-e-dil par khun-basta chashm-e-hairaan paivasta laan-gardaan be-did balki be-dard balki kamine dil par tufaan uThaa rakhaa thaa aankhon ne vaah-vaa kaa us ki nazar nahin thi kal aafrin-e-dil par rangin to bahut hai duniyaa magar mahaashay dhabbe se paD gae hain kuchh aastin-e-dil par vo maah-e-naaznin hai yaa sarv-aatishin hai yaa fitna-e-qayaamat barpaa zamin-e-dil par sab naa-malaamaton ko sab be-karaamaton ko sab sar-salaamaton ko laanaa hai din-e-dil par 'jaaved' ko dikhaa kar kahtaa hai sab se dilbar udham machaa rakhaa thaa in bhaai-ji ne dil par faaruqi aur ahmad-mushtaaq ko tahayyat shaakh-e-ghamgin-e-dil par hisn-e-hasin-e-dil par"

"hamesha dil havas-e-intiqaam par rakkhaa khud apnaa naam bhi dushman ke naam par rakkhaa vo baadshaah-e-firaaq-o-visaal hai us ne jo baar sab pa giraan thaa ghulaam par rakkhaa kiye hain sab ko ataa us ne ohda o mansab mujhe bhi sina-kharaashi ke kaam par rakkhaa koi savaar uThaa hai pas-e-ghubaar-e-fanaaa qazaa ne haath kulaah o niyaam par rakkhaa kisi ne be-sar-o-paai ke baavajud mujhe zamin-e-sajda o arz-e-qayaam par rakkhaa"

"hamaari ham-nafasi ko bhi kyaa davaam huaa vo abr-e-surkh to main nakhl-e-intiqaam huaa yahin se mere adu kaa khamir uTThaa thaa zamin dekh ke main tegh-e-be-niyaam huaa khabar nahin hai mire baadshaah ko shaayad hazaar martaba aazaad ye ghulaam huaa ajab safar thaa ajab-tar musaafirat meri zamin shuru hui aur main tamaam huaa vo kaahili hai ki dil ki taraf se ghaafil hain khud apne ghar kaa bhi ham se na intizaam huaa hui hai khatm dar-o-baam ki kam-asbaabi mayassar aaj vo saamaan-e-inhidaam huaa"

"gae the vahaan ji mein kyaa Thaan kar ke chale aae iraan turaan kar ke agar dil kaa bil-farz gul naam paD jaae to phir hai ye siina gulistaan kar ke diyaa ham ne dil un pari-chehragaan ko zaru-e-qayaas aadmi jaan kar ke ye duniyaa hamein khush na aaegi phir bhi rahein khvaah khud ko sulaimaan kar ke tire gham mein jis se mizha tar karun huun vo ik qatra hai qulzumistaan kar ke dikhaa hi diyaa aakhirash ahl-e-dil ne isi daane se khet khaliyaan kar ke ye kyaa chiiz taamir karne chale ho binaa-e-mohabbat ko viraan kar ke miyaan ham to 'jaaved' ko le gae the diyaa hi nahin us ne pahchaan kar ke"

"nihaal-e-vasl nahin sang-baar karne ko bas ek phuul hai kaafi bahaar karne ko kabhi to apne faqiron ki dil-kushaai kar kai khazaane hain tujh par nisaar karne ko ye ek lamhe ki duuri bahut hai mere liye tamaam umr tiraa intizaar karne ko kashish kare hai vo mahtaab dil ko zoron ki chalaa ye qatra bhi qulzum nisaar karne ko to phir ye dil hi na le aauun khuub chamkaa kar tire jamaal kaa aaina-daar karne ko qabaa-e-marg ho yaa rakht-e-zindagi ai dost mile hain donon mujhe taar taar karne ko bahut saa kaam diyaa hai mujhe un aankhon ne havaala-e-dil-e-naa-kardaa-kaar karne ko"

"baarish kaa hai aisaa kaal sukhe paDe hain dil ke taal ye hi mere dukh sukh hain kapDaa lattaa aaTaa daal dilli kaa takhta ulTaa dil ki jami hai magar chaupaal aainda ki fikr na kar varna dekh le meraa haal aansu piinaa gham khaanaa kaafi hai ye rizq-e-halaal duniyaa aur duniyaa ki chaah jhuTaa dariyaa naqli jaal dil kaa guzaaraa kaise ho saare yaar hue kangaal jivan nangaa parbat hai kaThin chaDhaai beDhab Dhaal aag se yaari mat karnaa aise dil ko bhaaD mein Daal miTTi ko parvaa hi nahin kis kaa chaand hai kis kaa laal"

"kiyaa hai dil ne begaana jahaan-e-murgh-o-maahi se hamein jaagir-e-aazaadi mili darbaar-e-shaahi se khilaa hai ghuncha-e-hairat havaa-e-gaah-gaahi se hue majzub rafta rafta us ki kam-nigaahi se tiri duniyaa mein ai dil ham bhi ik goshe mein rahte hain hamein bhi kuchh ummidein hain tiri aalam-panaahi se reaayaa mein shahanshaah-e-junun ki ham bhi daakhil hain hamein bhi kuchh na kuchh nisbat to hai zill-e-ilaahi se hue hain bas-ki baiat us nazar ke khaanvaade mein faqiri se taalluq hai na matlab baadshaahi se kiyaa hai us nazar ne sarfaraaz ahl-e-mohabbat ko kisi ko taaj-daari se kisi ko be-kulaahi se kahaan vo khaanumaan-barbaadi-e-ishq aur kahaan ye ham phiraa karte hain yunhi dar-ba-dar vaahi tabaahi se"

"dil aaina hai magar ik nigaah karne ko ye ghar banaayaa hai us ne tabaah karne ko gul-e-visaal abhi dekhaa na thaa ki aa pahunchi shab-e-firaaq bhi aankhein siyaah karne ko galim o takht utaare hain ghaib se us ne mujhe faqir tujhe baadshaah karne ko saje hain dasht o bayaabaan ajab qarine se tujhe savaar mujhe gard-e-raah karne ko mili mujhe tiri ham-saaegi so duniyaa mein tamiz-e-martaba-e-koh-o-kaah karne ko damida har shajar-e-gard-baad nakhl-e-junun hamaare chaak-e-garebaan se raah karne ko Dil-e-gudaakhta o chashm-e-tar hi kaafi hai futuh-e-mamlikat-e-mehr-o-maah karne ko"

"dil-e-betaab ke hamraah safar mein rahnaa ham ne dekhaa hi nahin chain se ghar mein rahnaa svaang bharnaa kabhi shaahi kabhi durveshi kaa kisi surat se mujhe us ki nazar mein rahnaa ek haalat pe basar ho nahin sakti meri jaama-e-khaak kabhi khilat-e-zar mein rahnaa din mein hai fikr-e-pas-andaazi-e-sarmaaya-e-shab raat bhar kaavish-e-saamaan-e-sahar mein rahnaa dil se bhaage to liyaa dida-e-tar ne goyaa aag se bach ke nikalnaa to bhanvar mein rahnaa ahl-e-duniyaa bahut aaraam se rahte hain magar kab mayassar hai tiri raahguzar mein rahnaa vasl ki raat gai hijr kaa din bhi guzraa mujhe vaaraftagi-e-haal-e-digar mein rahnaa kar chukaa hai koi aflaak o zamin ki takmil phir bhi har aan mujhe arz-e-hunar mein rahnaa"

"achchhi guzar rahi hai dil-e-khud-kafil se langar se roTi lete hain paani sabil se duniyaa kaa koi daagh mire dil ko kyaa lage maangaa na ik diram bhi kabhi is bakhil se kyaa boriyaa-nashin ko havas taaj o takht ki kyaa khaak-aashnaa ko gharaz asp o fiil se dil ki taraf se ham kabhi ghaafil nahin rahe karte hain paasbaani-e-shahr us fasil se gahvaara-e-safar mein khuli hai hamaari aankh taamir apne ghar ki hui sang-e-mil se ik shakhs baadshaah to ik shakhs hai vazir goyaa nahin hain donon hamaari qabil se duniyaa mire paDos mein aabaad hai magar meri duaa-salaam nahin us zalil se 'jaaved' ek gham ke sivaa dil mein hai bhi kyaa ham ghar chalaa rahe hain mataa-e-qalil se"

"us ke lahje kaa vo utaar chaDhaao raat ki narm rau nadi kaa bahaao us ki aankhon ke vasf kyaa likkhun jaise khvaabon kaa be-karaan Thahraao un nigaahon ki guftugu mein hai niind mein gum havaaon kaa uljhaao us badan ki nazaakatein mat puchh shisha-e-gul mein chaand kaa lahraao niind ki vaadiyon mein pichhle pahar ek lai ek naghma ek alaao aisi tanhaai kaa mudaavaa kyaa saat dariyaaon mein akeli naav un labon ki vo bosa bosa uThaan aur palkon kaa nashsha nashsha jhukaao us gali us dayaar ki khush-bu ai subuk-sair narm-gaam havaao naujavaani mein maut ki khvaahish tum hi samjhaa sako to kuchh samjhaao jaane vo ghuncha kis chaman kaa hai jis mein gum hai bahaar kaa phailaao raat kahti hai mujh ko pyaar se dekh mujh mein hai chashm-e-yaar kaa gahraao shola-e-jaan hai bujhne ko 'jaaved' aur dil mein dahak rahaa hai alaao"