Ghazal

ye kyaa ki faqat apni hi tasvir banaao

ai naqsh-garo vusat-e-fan kuchh to dikhaao

khultaa nahin kyaa laala-o-gul soch rahe hain

kuchh tum hi kaho fasl-e-bahaaraan ki havaao

· · ·

choT phulon ki chhaDi se bhi na kyon dil par lage

shahr mein har aadmi jab dard kaa paikar lage

kaar-gaah-e-zindagi goyaa hai dasht-e-karbalaa

raaste mein jis taraf bhi jaaiye Thokar lage

· · ·

mujh ko auron se koi shikva nahin

main ne bhi to khud ko pahchaanaa nahin

sar pe aa pahunchaa hai suraj karb kaa

saath apne saaya bhi apnaa nahin

· · ·

main ne aaj ek tamaashaa dekhaa

saaghar-e-chashm mein dariyaa dekhaa

raat ik khvaab niraalaa dekhaa

dosh par apnaa janaaza dekhaa

· · ·

junun-e-shauq-e-mohabbat ki aagahi denaa

khudi bhi jis pe ho qurbaan vo be-khudi denaa

na shor chaahiye dariyaa ki tund maujon kaa

mire lahu ko samundar ki khaamushi denaa

· · ·

mujh ko auron se koi shikvaa nahin

main ne bhi to khud ko pahchaanaa nahin

sar pe aa pahunchaa hai suraj karb kaa

saath apne saaya bhi apnaa nahin

· · ·

zakhm dil kaa khun-chakaan aisaa na thaa

ab se pahle jaan-sitaan aisaa na thaa

larza-bar-andaam hai qasr-e-yaqin

aadmi said-e-gumaan aisaa na thaa

· · ·

kyuun malaamat kaa hadaf gardish-e-paimaana bane

laghzish-e-paa se miri kaaba-o-but-khaana bane

aql ke bas ki nahin bakhiyaa-giri phulon ki

dard jis ko ho gulistaan kaa vo divaana bane

· · ·

dasht-dar-dasht phiraa kartaa huun pyaasaa huun main

aur duniyaa ye samajhti hai ki dariyaa huun main

tang sahraa nazar aayaa hai jo phailaa huun main

ho gai hai miri tasvir jo simTaa huun main

· · ·

ye kyaa ki chehra naqaab-andar-naqaab rakkho

yahi hai kaafi bachaa ke aankhon ki aab rakkho

kahaa ye kis ne ki roz-o-shab kaa hisaab rakkho

ba-naam-e-jaan karb-e-mustaqil kaa azaab rakkho

· · ·

chaak-dar-chaak hai phulon ki qabaa sunte hain

panja-kash aaj hai gulshan ki havaa sunte hain

tum ne chheDaa to nahin saaz-e-tabassum apnaa

tez hai dil ke dhaDakne ki sadaa sunte hain

· · ·

kyon shahr-e-dil mein tifl-e-tamanna ko paa liye

apne har ek shauq ki pagDi uchhaaliye

tanhaa bahisht-e-shauq mein aadam hai aaj bhi

pasli se vaqt ki koi havvaa nikaaliye

· · ·

man ke saagar mein koi tufaan uThaao

kaisaa sannaaTaa hai ik patthar to pheinko

aadmi hai reza-reza kyon na puchho

infiaal-e-aagahi bhi kaash dekho

· · ·

vo masaaf-e-zist mein har moD par tanhaa rahaa

phir bhi honTon par na us ke koi bhi shikva rahaa

jo sadaa tishna-labon ke vaaste dariyaa rahaa

umr bhar vo khud ba-naam-e-dostaan pyaasaa rahaa

· · ·

shama ki tarah pighalte rahiye

apni hi aag mein jalte rahiye

aaj insaan kaa muqaddar hai yahi

har nae saanche mein Dhalte rahiye

· · ·

gumraah ho gayaa rah-e-hamvaar dekh kar

chalnaa thaa dil ko jaada-e-dushvaar dekh kar

jo sar jhukaa thaa sang-e-dar-e-yaar dekh kar

unchaa huaa hai phir rasan-o-daar dekh kar

· · ·

nazar jo aataa hai baahar mein kab vo andar huun

main aadmi huun kahaan aadmi kaa paikar huun

rahaa jo bhiiD mein bhi mushfiqon ki sar-afraaz

khudaa-gavaah mein vaisaa hi ek masdar huun

· · ·

zindagi se miri is tarah mulaaqaat hui

lab hile aankh mili aur na koi baat hui

dard ki dhuup nahin yaad kaa saaya bhi nahin

ab to qismat meri be-rangi-e-haalaat hui

· · ·

dil ke dar par qufl paDaa hai tum bhi chup ho ham bhi chup

khaamoshi ab shart-e-vafaa hai tum bhi chup ho ham bhi chup

be-sauti ab saut-o-sadaa hai tum bhi chup ho ham bhi chup

lafzon kaa dam TuuT gayaa hai tum bhi chup ho ham bhi chup

· · ·

dil ke darvaaze pe dastak ki sadaa koi nahin

kaun si manzil hai ye aavaaz-e-paa koi nahin

majlis-e-aalaam se kis tarah nikle zindagi

ye vo zindaan hai ki jis kaa raasta koi nahin

· · ·

tere rukh-e-sabih ne rang-e-sahar dikhaa diyaa

zulmat-e-shab mein bhi mujhe jiine kaa hausla diyaa

sehr-e-nazar se aap ke husn-e-bayaan milaa diyaa

main ne urus-e-sher ko kitnaa hasin banaa diyaa

· · ·

main koi gul huun ki sar apne chaDhaao logo

main to huun qarz mujhe sar se utaaro logo

kyaa kinaare pe khaDe soch rahe ho logo

man ke saagar mein bhi to ghota lagaao logo

· · ·

kabhi paDho to mujhe harf-e-mo'tabar ki tarah

ye kyaa ki paDhte ho farsuda si khabar ki tarah

qalam to karte ho sar ko mire magar sun lo

main reg-zaar-e-vafaa mein huun ek shajar ki tarah

· · ·