Ghazal

"shauq-e-aavaara dasht-o-dar se hai tohmat-e-sang zakhm-e-sar se hai jaada raah-e-bahisht ham ko nadim ye iram gard-e-rahguzar se hai aablon se nigaar-e-sahraa hai rishta-e-gham payaambar se hai ab kharaabi se hain dar-o-divaar ab jaras jaada-e-safar se hai ranj-e-be-chaargi shab-e-gham se bazm-e-mai muzhda-e-sahar se hai"

"na sahraa hai na ab divaar-o-dar hai chaman mein naghma-gar saaz-e-sahar hai suraagh-e-kaarvaan-e-rang-o-bu se sabaa aavaara-e-gard-e-safar hai asiro ab dar-e-zindaan karo baaz sar-e-naakhun koi uqd-e-guhar hai nadimo daad do ahl-e-junun ko namak-daan zakhm-e-paa hai zakhm-e-sar hai"

"yaqin-e-subh-e-chaman hai kitnaa shuur-e-abr-e-bahaar kyaa hai savaal karte hain dasht-o-dariyaa ki qaafile kaa vaqaar kyaa hai jo chal paDe jaada-e-vafaa par unhein gham-e-rozgaar kyaa hai saubaton ke pahaaD kyaa hain tamaazaton kaa ghubaar kyaa hai yahin pe manzil kareinge raahi yahin pe sab qaafile rukeinge Thahar zaraa shauq-e-sabr dushman ye dard be-ikhtiyaar kyaa hai nasib-e-fardaa pe shaadmaan hain junun ke maaron se koi puchhe ye kyuun girebaan hai TukDe TukDe ye daaman-e-taar taar kyaa hai na un kaa jaada na koi manzil na nur-o-zulmat kaa farq jaanein unhein khabar kyaa ki hai sahar kyaa andheri shab kaa khumaar kyaa hai"

"nigaah-e-shauq se kab tak muqaabla karte vo iltifaat na karte to aur kyaa karte ye rasm-e-tark-e-mohabbat bhi ham adaa karte tere baghair magar zindagi ko kyaa karte ghurur-e-husn ko maanus-e-iltijaa karte vo ham nahin ki jo khud-daariyaan fanaa karte kisi ki yaad ne taDpaa diyaa phir aa ke hamein hui thi der na kuchh dil se mashvaraa karte ye puchho husn ko ilzaam dene vaalon se jo vo sitam bhi na kartaa to aap kyaa karte sitam-shiaar azal se hai husn ki fitrat jo main vafaa bhi na kartaa to vo jafaa karte hamein to apni tabaahi ki daad bhi na mili tiri navaazish-e-bejaa kaa kyaa gilaa karte nigaah-e-naaz ki maasumiyat are tauba jo ham fareb na khaate to aur kyaa karte nigaah-e-lutf ki taskin kaa shukriyaa lekin mataa-e-dard ko kis dil se ham judaa karte"

"ufuq ke khunin dhundlakon kaa subh naam nahin qadam baDhaa ki ye saathi tiraa maqaam nahin abhi na de mujhe izn-e-bahaar ai saaqi abhi hayaat sitaaron se ham-kalaam nahin milaa hai ab kahin sadiyon ke baad maston ko vo mai-kada ki jahaan koi tishna kaam nahin na aarizon pe shafaq hai na gesuon mein shikan ye subh-o-shaam nahin mere subh-o-shaam nahin bahaar-e-dair-o-haram le ke kyaa karun naaseh ye qaafile to abhi tak sahar-maqaam nahin qadam qadam pe hai darkaar jahd-o-fikr-o-amal ye zindagi hai sadaa-e-shikast-e-jaam nahin abhi to daaman-e-shab mein sisak rahi hai sahar baDhe chalo ki abhi saaat-e-qayaam nahin"

"nashili chhaanv mein biite hue zamaanon ko lagaa do aag ajal ke nigaar-khaanon ko bataa rahe hain jabin-e-hayaat ke tevar panaah mil nahin sakti ab aastaanon ko diye jalaao ki insaaniyat ne toD diyaa jahaan-e-zar ke ru-pahle tilism-khaanon ko har ek gaam pe mashal dikhaa rahi hai hayaat sitam ki aanch mein nikhre hue zamaanon ko hazaar daar-o-rasan Dagmagaa nahin sakte ajal ki god mein khele hue javaanon ko bahut qarib hai vo daur khush-gavaar ki jab nigaar-e-amn sajaaegi kaar-khaanon ko khud aage baDh ke qadam chumti hai manzil-e-shauq ye kis ne raah dikhaai hai kaarvaanon ko"

"mataa-e-shauq to hai dard-e-rozgaar to hai agar bahaar nahin ishrat-e-bahaar to hai adaa-e-chaak-e-garebaan se baa-khabar na sahi junun-e-shauq ko fardaa kaa eatibaar to hai taras rahe hain dil-o-jaan jo rang-o-bu ke liye mire nasib mein ik dasht-e-intizaar to hai kahaan nasib havas ko junun ki aaraaish lahu lahu hai garebaan taar taar to hai in aablon ko hiqaarat se dekhne vaale in aablon se chaman kaa tire vaqaar to hai hazaar tarah se rusvaa hain ahl-e-dard to kyaa tiraa dayaar to hai teraa rahguzaar to hai hayaat talkh sahi roz-o-shab haraam sahi dil-o-nazar ko ye maahaul saazgaar to hai"

"khulus-e-alfaaz kaam aayaa nigaah-e-ahl-e-fitan se pahle naved-e-dil ne mujhe pukaaraa sadaa-e-daar-o-rasan se pahle vajud-e-charkh-e-kuhan se pahle qayaam-e-dar-o-rasan se pahle hamin the tere chaman ki zinat bahaar-e-husn-e-chaman se pahle sukut-e-gham ki adaa adaa ko samajh sakein kaash ahl-e-'aalam ishaara-haa-e-latif bhi hain jabin pe naqsh-e-shikan se pahle bahaar-e-be-kaif kis liye hai gulon pe rang-e-shikast kyuun hai abhi to kitni hi bijliyaan hain chaman mein tark-e-chaman se pahle"

"dard ke saanche mein Dhal kar rah gai zindagi karvaT badal kar rah gai vaqt-e-nazzaara nigaah-e-baaryaab un ke jalvon mein machal kar rah gai aankh mein aansu machal kar rah gae mauj dariyaa mein uchhal kar rah gai kyaa kiyaa ai bulbul-e-aatish-navaa aashiyaan mein barq jal kar rah gai un kaa gham mujh ko vadiat ho gayaa saari duniyaa haath mal kar rah gai"

"kaarvaan tira-shab mein chalte hain aandhiyon mein charaagh jalte hain laakh zindaan hon laakh daar-o-rasan ab iraade kahin badalte hain kis adaa se sahar ke divaane surkh parcham liye nikalte hain rok saktaa hai kyaa unhein sayyaad jo qafas toD kar nikalte hain kitni sadiyon se zehn-e-insaan mein rang-o-nikhat ke khvaab palte hain"

"raqs-e-aashuftaa-sari ki koi tadbir sahi lo mire paanv mein ik aur bhi zanjir sahi imtihaan is dil-e-pur-shauq kaa karte rahiye aur is jurm-e-vafaa par koi taazir sahi taan-o-dushnaam se divaane na baaz aaeinge koi ilzaam sahi tohmat-e-taqsir sahi ham to aavaara-e-sahraa hain hamein kyaa matlab un ki mahfil mein junun ki koi tauqir sahi har koi yusuf-e-kanaan to nahin ban saktaa meraa fardaa hi mire khvaab ki taabir sahi qaafile kitne hi manzil se bhaTak jaate hain ham musaafir na sahi ham koi rah-gir sahi naara-e-zulf-e-sanam shart-e-junun kyaa maani dard rusvaa hi sahi ishq jahaangir sahi"

"tamaam husn-e-jahaan kaa javaab ho ke rahaa jo dard dil se uThaa aaftaab ho ke rahaa vo baargaah-e-junun hai nasib-e-ishq-e-vafaa ye dil ye shauq nazar-baaryaab ho ke rahaa vahi safar hai vahi rasm-e-aablaa-paai yaqin-e-raah miraa kaamyaab ho ke rahaa bahut aziiz na kyuun ho ki dard hai teraa ye dard baDh ke rahaa iztiraab ho ke rahaa ajiib chiiz hai ye shauq-e-aarzu-mandi hayaat miT ke rahi dil kharaab ho ke rahaa"

"falsafi kis liye ilzaam-e-fanaa detaa hai lafz-e-kun khud miri hasti kaa pata detaa hai ho gayaa tark-e-maraasim ko zamaana lekin aaj tak dil tiri nazron ko duaa detaa hai thartharaate hue haathon se davaa ke badle chaaragar aaj na jaane mujhe kyaa detaa hai kuchh to hotaa hai hasinon ko bhi ehsaas-e-jamaal aur kuchh ishq bhi maghrur banaa detaa hai soz-e-ulfat se vo kam-maaya-e-gham hai mahrum aatish-e-dil ko jo ashkon se bujhaa detaa hai parda-daari bhi hai ik maslihat-e-khaas-e-jamal shauq nazzaare ki qimat ko baDhaa detaa hai zindagi de ke musibat mein hamein Daal diyaa koi yuun bhi kahin be-jurm sazaa detaa hai daar mil hi gai mansur ko vaaiz varna kaun duniyaa mein mohabbat kaa sila detaa hai haae us bekas-o-majbur ki qismat 'arshi' shaam se pahle hi jo shama jalaa detaa hai"

"nigaah tez shuur-e-buland rakhte hain ham apnaa ishq bahut hosh-mand rakhte hain ham apne saath dil-e-dard-mand rakhte hain koi ho bazm use sar-buland rakhte hain hamein gharaz nahin munim hai kaun haatim kaun kulaah-e-qais sar-e-arjumand rakhte hain rafiqon tum hi nahin paasbaan-e-shart-e-vafaa ki ham bhi un se iraadat do-chand rakhte hain"