Ghazal

"sujhi tadbir na kuchh ranj-o-balaa se pahle zindagi chhoD gai saath qazaa se pahle ye sulagtaa huaa iflaas kaa chaDhtaa suraj maar Daale na kahin garm havaa se pahle aasmaan par bhi pahunchnaa koi dushvaar nahin chaahiye dil mein taDap harf-e-duaa se pahle raakh ke Dher tumhein is ki gavaahi deinge mujh ko apnon ne jalaayaa chitaa se pahle pyaar kaa naam bhi badnaam ho jaae 'asar' tum bujhaa do ye diyaa tez havaa se pahle"

"lagi hai gasht karne ye khabar aahista aahista kamar kasne lagaa hai fitna-gar aahista aahista kutar Daalo use jitnaa bhi tum sone ki qainchi se parinde kaa nikal aataa hai par aahista aahista Dubo kar manchali kashti ko maujon ne kahaa hans kar kiyaa jaataa hai paani mein safar aahista aahista tilismi baansuri naadaan bachchon ko na denaa tum ujaD jaaegaa maasumon kaa ghar aahista aahista safar ki lazzatein kyaa hain safar ke pech-o-kham kyaa hain samajh jaaegaa apnaa ham-safar aahista aahista kalaam-e-narm-o-naazuk ko banaanaa apnaa sheva tum utar jaaegaa siine mein 'asar' aahista aahista"

"apni nazrein dar-o-divaar par aksar rakhnaa ajnabi ghar mein qadam soch-samajh kar rakhnaa kahin phaT jaae kaleja na vufur-e-gham se apni palkon mein chhupaa kar na samundar rakhnaa itnaa aasaan nahin un ko bhulaanaa dil se soch kar apne kaleje pe ye patthar rakhnaa yaad aataa hai vo manzar tire afsaane kaa apne mahbub ko dushman ke baraabar rakhnaa khvaab mein aaeinge pur-nur parinde lekin shart hai saaf magar zehn kaa bistar rakhnaa saunp di main ne tumhein mehr-o-vafaa ki kunji lauT aaungaa saliqe se miraa ghar rakhnaa ai 'asar' abru phulon ki jhulas jaaegi tum na sho'lon ki hatheli pe gul-e-tar rakhnaa"

"ye maanaa havaadis ke dhaare bahut hain agar hausla hai kinaare bahut hain rah-e-zindagi mein chalo tum sambhal kar samay ke tamaanche karaare bahut hain talaatum mein khud kho gae tum hi varna kinaare to tum ko pukaare bahut hain nikal kar andheron ke malbus se dekho yahaan raushni ke manaare bahut hain kahin ye jalaa dein na chilman ko teri miri shaairi mein sharaare bahut hain zaraa fan ke aakaash gangaa mein dekhein 'asar' aap jaise sitaare bahut hain"

"ab koi baat baDhaane ki zarurat na rahi haal-e-dil un ko sunaane ki zarurat na rahi masale ho gae be-rukh hi siyaasat ke shikaar koi aavaaz uThaane ki zarurat na rahi qaafile dard ke khud dil se guzar jaate hain raaste un ko dikhaane ki zarurat na rahi vaqt vo hai ki hue donon anaa se sarshaar zindagi saath nibhaane ki zarurat na rahi apne aangan mein mile ham ko muqaffal rishte koi divaar uThaane ki zarurat na rahi apni fitrat se 'asar' vo bhi shanaavar niklaa tairnaa us ko sikhaane ki zarurat na rahi"

"nizaam-e-jahaan bhi ajab hai niraalaa andheron se Darne lagaa hai ujaalaa vo fōtpath par apnaa fan bechtaa thaa sitamgar jahaan ne ise raund Daalaa anaa se kahaan kis ko mukti mili hai hai mazbut kitnaa ye makDi kaa jaalaa yahi vo gharibi ki galiyaan hain yaaro jahaan roz biktaa hai izzat kaa pyaala ye firqa-parasti kaa manhus bandar 'asar' toD Daalegaa millat ki maalaa"

"baazaar-e-mohabbat mein sharminda sharaafat hai phulon ki numaaish hai khushbu ki tijaarat hai hanste hue gulshan ko pal bhar mein rulaa Daale aavaara havaaon mein aisi bhi mahaarat hai taamir kaa jazba bhi takhrib kaa naqsha bhi ye shauq-e-shahaadat hai yaa zauq-e-baghaavat hai bujhte hue angaare paighaam ye dete hain shoalon se ulajhne ki shabnam mein jasaarat hai auqaat ki had se vo aage nahin baDh saktaa qismat ki hatheli par raushan ye ibaarat hai ashaar 'asar' mere mansub usi se hain jis fikr-e-rasaa ki bhi angDaai qayaamat hai"

"muddaaa kuchh bhi ho lekin muddaaa rakkhaa karo jazba-e-taamir se bhi vaasta rakkhaa karo zindagi ke raaste mein hain hazaaron Thokarein aabla-paai salaamat jo sila rakkhaa karo mil hi jaate hain ye aksar zindagi ki moD par ajnabi chehron se khud ko aashnaa rakkhaa karo dekhnaa shola-bayaani bhi adaa ban jaaegi talkhi-e-izhaar mein husn-e-adaa rakkhaa karo mom se bhi dosti ho aur shoalon se bhi pyaar phir bhi un ke darmiyaan kuchh faasla rakkhaa karo ghup andheraa ho to phir milti nahin raah-e-najaat zehn-o-dil kaa raushni se raabta rakkhaa karo tum ko jiinaa hai 'asar' is inqilaabi daur mein apni fitrat mein zaraa fikr-e-rasaa rakkhaa karo"