Ghazal

parda chehre se haTaae to ghazal ho jaae

zindagi saamne aae to ghazal ho jaae

sard saDkon pe sisakte hue sannaaTon kaa

dard jab dil mein samaae to ghazal ho jaae

· · ·

kaun kahtaa hai mahv-e-khvaab huun main

sach to vo hai ki inqalaab huun main

zindagi kyaa hai aur maut hai kyaa

in savaalaat kaa javaab huun main

· · ·

nafrat ki siyaasat 'aam hui ikhlaas-o-mohabbat bhuul gae

ham apne buzurgon ki hikmat paighaam-o-nasihat bhuul gae

mazhab ke maqaasid ik jaise afkaar-o-‘aqaaed yak-rangi

ik raah pe chalne vaale sab sadiyon ki rifaaqat bhuul gae

· · ·

ho gai nangi ye duniyaa mere aage

ik tamaasha hai anokhaa mere aage

raqs-e-tufaan-e-havaadis hai ki jaise

naachtaa ho koi bachcha mere aage

· · ·

paani se duur rah ke bhi tairaak ho gae

ab saada-lauh log bhi chaalaak ho gae

maanind-e-barq yaa ki thaa vo surat-e-sharar

aise nazar uThaai ki ham khaak ho gae

· · ·

ek dil be-qaraar aur duniyaa

har nafas sho'la-baar aur duniyaa

zindagi ki yahi haqiqat hai

aarzu intizaar aur duniyaa

· · ·

koi daanaa koi divaana milaa

shahr mein har shakhs begaana milaa

main use pahchaan to letaa magar

jab milaa vo ban ke afsaana milaa

· · ·

dekh in chiDiyon ko chiDiyaa-ghar na dekh

lauT mat pichhe ko yuun muD kar na dekh

haathiyon ki piiTh par baiThaa hai din

shaam se pahle koi manzar na dekh

· · ·

phir lauT ke aayaa huun tanhaai ke jangal mein

ik shahar-e-tasavvur hai ehsaas ke har-pal mein

tu misr ki malika hai main yusuf-e-kanaan huun

afsos magar gum hain tafriq ke daldal mein

· · ·

justuju ke paanv ab aaraam saa paane lage

ab hamaare paas bhi kuchh raaste aane lage

vaqt aur haalaat par kyaa tabsira kiije ki jab

ek uljhan dusri uljhan ko suljhaane lage

· · ·

ho na ho aas-paas hai koi

mere jitnaa udaas hai koi

sochtaa huun to aur baDhti hai

zindagi hai ki pyaas hai koi

· · ·

aa rahaa hai shabaab aane do

ab to ye inqalaab aane do

vo qayaamat ki baat karte hain

phir to hogaa hisaab aane do

· · ·

sochtaa huun main ki sochaa jaae kyaa

kyaa na dekhe aur dekhaa jaae kyaa

raushni hoti to koi baat thi

is andhere ghar mein DhunDhaa jaae kyaa

· · ·

ghaDi-bhar khalvaton ko aanch de kar bujh gayaa suraj

kisi ke dard ki lai par kahaan tak naachtaa suraj

nigaahon mein nae andaaz se phir raushni hogi

jab ug aaegaa zehnon mein hamaare ik nayaa suraj

· · ·

khol simaT ke andar simaT kar rah gayaa main

apni saae se bhi kaT kar rah gayaa main

le gayaa vo chhin kar meri javaani

us pe bas yuun hi jhapaT kar rah gayaa main

· · ·

miltaa nahin khud apne qadam kaa nishaan mujhe

kin marhalon mein chhoD gayaa kaarvaan mujhe

lamhe kaa lams phail chukaa kaaenaat par

aavaaz dene aai hain ab duriyaan mujhe

· · ·

khol ke andar simaT kar rah gayaa main

apne saae se bhi kaT kar rah gayaa main

le gayaa vo chhin kar meri javaani

us pe bas yunhi jhapaT kar rah gayaa main

· · ·

main jahaan jaaun mire saath chale sannaaTaa

meri aankhon mein lagaataar jale sannaaTaa

subh aati hai dabe paanv chali jaati hai

gher letaa hai mujhe shaam Dhale sannaaTaa

· · ·

mujh se mil kar khud ko kyaa paaegaa tu

aur tanhaa ho ke rah jaaegaa tu

ye ThiThurti dhuup hai is dhuup mein

kaise apnaa khuun garmaaegaa tu

· · ·

sard sannaaTon ki sab sargoshiyaan le jaaungaa

main jahaan bhi jaaungaa dil ki zabaan le jaaungaa

shahr chhoDungaa to roeingi milon ki chimniyaan

dekhnaa ik roz main saaraa dhuaan le jaaungaa

· · ·

daulat-e-haq mujh ko haasil ho gai hai

zindagi ab aur mushkil ho gai hai

ab nahin aasaan duniyaa se guzarnaa

is ki parchhaain muqaabil ho gai hai

· · ·

jaagte zakhmon ki mahfil hai ki shab

ye koi TuuTaa huaa dil hai ki shab

qabr se baahar nikal aai hai aaj

daastaan-e-karb-e-haasil hai ki shab

· · ·

kabhi jo shab ki siyaahi se naa-gahaan guzre

ham ahl-e-zarf har ik soch par garaan guzre

nigaah-o-dil se miTaa dein jo tishnagi kaa azaab

vo aabshaar ke dhaare abhi kahaan guzre

· · ·

zindagaani ranj aur gham ke sivaa kuchh bhi nahin

uf ki har-dam sog-o-maatam ke sivaa kuchh bhi nahin

roz-o-shab apne guzar jaanaa dayaar-e-ghair mein

daastaan-e-azm-e-mohkam ke sivaa kuchh bhi nahin

· · ·