Ghazal

dil-e-izaa-talab le teraa kahnaa kar liyaa main ne

kisi ke hijr mein jiinaa gavaaraa kar liyaa main ne

but-e-paimaan-shikan se intiqaaman hi sahi lekin

sitam hai vaada-e-tark-e-tamannaa kar liyaa main ne

· · ·

khushi se phulein na ahl-e-sahraa abhi kahaan se bahaar aai

abhi to pahunchaa hai aablon tak miraa mazaaq-e-barhana-paai

tire mufakkir samajh na paae mizaaj-e-tahzib-e-mustafaai

usul-e-johd-e-baqaa ke bande buland hai zauq-e-khud-fanaai

· · ·

tumhaare qasr-e-aazaadi ke me'maaron ne kyaa paayaa

jahaan-baazon ki ban aai jahaan-kaaron ne kyaa paayaa

sitaaron se shab-e-gham kaa to daaman jagmagaa uTThaa

magar aansu bahaa kar hijr ke maaron ne kyaa paayaa

· · ·

jo rahaa yuun hi salaamat miraa jazb-e-vaalhaana

mujhe khud karegaa sajda tiraa sang-e-aastaana

rah-e-haq ke haadson kaa na sunaa mujhe fasaana

tiri rahbari ghalat thi ki bahak gayaa zamaana

· · ·

kohsaar kaa khugar hai na paaband-e-gulistaan

aazaad hai har qaid-e-maqaami se musalmaan

ghar kunj-e-qafas ko bhi banaa leti hai bulbul

shaahin ki nigaahon mein nasheman bhi hai zindaan

· · ·

kabhi be-niyaaz-e-makhzan kabhi dushman-e-kinaaraa

kahin tujh ko le na Duube tiri zindagi kaa dhaaraa

miri quvvat-e-nazar kaa kai rukh se imtihaan hai

kabhi uzr-e-lan-taraani kabhi daavat-e-nazaaraa

· · ·

ba-roz-e-hashr mire saath dil-lagi hi to hai

ki jaise baat koi aap se chhupi hi to hai

na chheDo baada-kasho mai-kade mein vaaiz ko

bahak ke aa gayaa bechaara aadmi hi to hai

· · ·