Ghazal

nigaah par jo paD rahi thi dhuul se nikal gae

samajh rahe the sab ghalat ki bhuul se nikal gae

ye maahtaab-e-shams hai ye aaftaab-e-fikr-o-fan

hijaab-e-jaan rahaa nahin qubul se nikal gae

· · ·

kaale kavvon ne tabaahi vo machaai tauba

baagh ke tote uDe baagh mein amrud na the

mere baare mein baDe logon ne kyaa kyaa na kahaa

vaaqi'a ye ki jinhein sunnaa thaa maujud na the

· · ·

koi naqqaad aas-paas nahin

she'r hai she'r mein qayaas nahin

haq-o-baatil bataanaa laazim thaa

masala karbalaa kaa pyaas nahin

· · ·

main kahaan DhunDne jaataa huun kutub-khaanon mein

mujh ko khud aa ke bulaaein mire alfaaz ki aa

main abhi soch ke sahraa mein khaDaa hotaa huun

aa hi jaati hai kisi samt se aavaaz ki aa

· · ·

chaar-su phaile nazar aae ujaale mere

koi aa dekhe paDe pair ke chhaale mere

main samajhtaa huun ki main kuchh bhi nahin huun lekin

log dete hain kai baar havaale mere

· · ·

husn-e-navaa-e-shauq ki taa’mil kar chale

sar ko uThaae 'ahd ki takmil kar chale

khaaki badan ko aatish-e-daaim ki lau pe rakh

hiddat baraa-e-jaan ki tarsil kar chale

· · ·

dhoka tire vajud se aage nikal gayaa

yaa'ni tu hast-o-bud se aage nikal gayaa

khushbu ki tarh phuul se main phailtaa rahaa

aur is tarah vajud se aage nikal gayaa

· · ·

tu abhi tak bhi mujhe khud se judaa jaantaa hai

main kabhi soch nahin saktaa khudaa jaantaa hai

mujh se bai'at kaa taqaazaa na tavaqqo' rakhnaa

meraa sar neze pe sajne ko jazaa jaantaa hai

· · ·