Ghazal

dhyaan kaa raahi ruk ruk kar pichhe taktaa hai

biite lamhe yaad aate hain dil rotaa hai

band dariche saf-basta gum-sum divaarein

shahar ki viraani se mujh ko khauf aataa hai

· · ·

sadaa kaa loch sukhan kaa nikhaar le ke chale

tiri nazar se fusun-e-bahaar le ke chale

tire jamaal ki subh-e-javaan thi aankhon mein

jabin pe shaam-e-sitam kaa ghubaar le ke chale

· · ·

aadmi apni zaat mein tanhaa

aalam-e-shash-jihaat mein tanhaa

ai khudaa tu hi be-misaal nahin

main bhi huun kaaenaat mein tanhaa

· · ·

ye ajab raasta hai jis pe lagaayaa hai mujhe

mahv-e-hairat huun ki kyaa chiiz banaayaa hai mujhe

teri duuri bhi hai mushkil tiri qurbat bhi muhaal

kis qadar tu ne miri jaan sataayaa hai mujhe

· · ·

huaa chali to nasha chhaa gayaa fazaaon mein

khayaal Duub gayaa duur ki sadaaon mein

na haath aae mire dauDte hue lamhe

safar kaTaa hai miraa baadalon ki chhaanv mein

· · ·

bhiiD aisi hai ki mujh ko raasta miltaa nahin

gul koi khiltaa nahin shoala koi uThtaa nahin

ai mire shauq-e-talab tere junun ki khair ho

tu ne kyaa had-e-nigah kaa faasla dekhaa nahin

· · ·

ta'alluqaat ke zakhmon kaa huun sataayaa huaa

jo shaam aai miraa saaya bhi paraayaa huaa

miTegaa zehn se kab teri yaad kaa afsun

hazaar sadiyon se ye bojh hai uThaayaa huaa

· · ·

vaqt ki tah mein utar jaaungaa

main bhi lamha huun guzar jaaungaa

ab jo niklaa huun tire khvaab liye

taa-ba-imkaan-e-nazar jaaungaa

· · ·

kaun hai kis kaa giraftaar na samjhaa jaae

yahi behtar hai ye asraar na samjhaa jaae

main ne kab duniyaa mein aane ki tamannaa ki thi

mujh ko duniyaa kaa talabgaar na samjhaa jaae

· · ·

tamannaaon ki duniyaa mein qadam dharne nahin deti

jo karnaa chaahtaa huun zindagi karne nahin deti

koi surat nahin hai zindagi se bach nikalne ki

gham-o-aalaam ke maaron ko bhi marne nahin deti

· · ·

teri talab mein aise giraftaar ho gae

ham log khud bhi raunaq-e-baazaar ho gae

kyaa khvaab thaa ki kuchh nahin Thahraa nigaah mein

kyaa aks thaa ki naqsh-ba-divaar ho gae

· · ·

aankh be-qaabu hai duniyaa ki tarah

dil hai pahlu mein tamannaa ki tarah

koi aavaaz koi guunj nahin

vaqt chup-chaap hai sahraa ki tarah

· · ·

har samt rang-o-nur kaa dariyaa dikhaai de

har mauj-e-rang mein tiraa chehra dikhaai de

har aaine mein teraa saraapaa dikhaai de

koi to is jahaan mein apnaa dikhaai de

· · ·

go husn ki surat hain miri samt ravaan bhi

ik khvaab si lagti hain mujhe raushaniyaan bhi

kuchh apni kaho Dubte taaron ko na dekho

shaayad na mile phir ye nashaat-e-guzaraan bhi

· · ·

aaj bhi mujh ko yuun lagtaa hai

jaise aaj tujhe dekhaa hai

teri judaai yuun kaaTi hai

saal ik pal mein biit gayaa hai

· · ·

phir ruk nahin sakaa huun kisi bhi chaTaan se

aisaa giraa huun roz-e-azal aasmaan se

hai jabr mein bhi ek gumaan ikhtiyaar kaa

do chaar har qadam pe hon ik imtihaan se

· · ·

tiri aankhein tiraa husn-e-javaan tahrir karte hain

zamin ki pastiyon mein aasmaan tahrir karte hain

koi mausam khizaan se aashnaa us ko nahin kartaa

ham apne khuun se jo gulsitaan tahrir karte hain

· · ·

dil ab tak ye soch rahaa hai

ye milnaa bhi kyaa milnaa hai

jaise koi anjaan musaafir

raste mein hairaan khaDaa hai

· · ·

ab to apne jism kaa saaya bhi begaana huaa

main tiri mahfil mein aa kar aur bhi tanhaa huaa

vaqf-e-dard-e-jaan huaa mahv-e-gham-e-duniyaa huaa

dil ajab shai hai kabhi qatra kabhi dariyaa huaa

· · ·

ek-tarfa be-khudi mein gum huaa rahtaa huun main

be-mahaabaa faaslon ko naaptaa rahtaa huun main

mere khadd-o-khaal ko pahchaannaa aasaan nahin

raaste ki gard mein aksar aTaa rahtaa huun main

· · ·

khud apni zaat kaa naam-o-nishaan bhuul gae

rihaa hue to parinde uDaan bhuul gae

is inhimaak se kaar-e-zamin mein mahv hue

zamin pe chhaayaa huaa aasmaan bhuul gae

· · ·