Ghazal

"puchh lete hain vo aksar ki hai haalat kaisi ham pe ho jaati hai un ki ye 'inaayat kaisi 'ahd-e-haazir mein to hai zikr bhi in kaa be-sud kaisaa aain-e-vafaa aur muravvat kaisi ghair ke gham mein bhi be-saakhta ro dete hain ham ko allaah ne bakhshi hai tabi'at kaisi 'ishq saadiq hai hamaaraa to hamein kyaa maa'lum shikva kyaa hotaa hai hoti hai shikaayat kaisi dast-e-qudrat kaa karishma ise samjhein varna khaar aur gul mein bhalaa baahami sohbat kaisi aap aae hain 'ayaadat ko to dam bhar Thahrein haal-e-dil puchhne mein aisi bhi 'ujlat kaisi ham to har haal mein raazi-ba-razaa hain 'gauhar' ham nahin jaante hoti hai 'ibaadat kaisi"

"kam kisi taur na hogi ye giraani sar se ab nahin jaaegaa aazaar-e-nihaani sar se kyon ubhartaa hi nahin jazba-e-ikhlaas-o-vafaa kyon nikalti hi nahin resha-davaani sar se abhi TuuTi hi kahaan aahani divaar-e-rusum abhi niklaa hi kahaan josh-e-javaani sar se meri ghairat kaa taqaazaa hai ki imdaad na luun unchaa hotaa hai to hotaa rahe paani sar se ho chukaa 'ahd-e-vafaa khatm hamaaraa kab kaa ab to vallaah nikaalo ye kahaani sar se ham ne girne na diyaa parcham-e-anvaar-e-khudi jab talak jaari rahi khuun ki ravaani sar se jab bhi hotaa hai sukhan-goi pe maail 'gauhar' khud chhalak paDte hain alfaaz-o-ma'aani sar se"

"tan par ahbaab ke ham khunin qabaa dekhte hain kaun is jurm ki paataa hai sazaa dekhte hain naakhudaa ne hamein manjhdaar mein laa kar chhoDaa kyaa hai apne liye farmaan-e-khudaa dekhte hain hamein kar detaa hai ehsaas-e-nadaamat zakhmi nutq jab oDhe khamoshi ki ridaa dekhte hain gul sharar-baar hain shabnam bhi lahu roti hai muzhda kyaa laae hai ab mauj-e-sabaa dekhte hain phir hai maa'sumiyat-e-husn pe yalghaar-e-gunaah phir lahu-rang huaa dast-e-hinaa dekhte hain din-o-imaan ke parastaar bichaare din raat sahme sahme hue taasir-e-du’aa dekhte hain 'ishq hi bakhshe hai khush-manzari ham ko 'gauhar' varna yaan silsila-e-raqs-e-qazaa dekhte hain"

"safar mein zindagi ke ham unhein rahbar samajhte hain jo sang-e-raah ko phulon hi kaa bistar samajhte hain bashar ne hi nahin samjhe rumuz-e-gardish-e-paiham rumuz-e-gardish-e-paiham mah-o-akhtar samajhte hain ilaahi raaz-e-hasti ek aisaa raaz hai jis ko na divaane samajhte hain na daanish-var samajhte hain khayaalon se hi sachchaai kaa andaaza nahin hotaa ki manzar dekhne vaale hi pas-manzar samajhte hain haqiqat ko samajhne mein khudi kaa zo'm haail hai haqiqat ham mataa'-e-be-khudi paa kar samajhte hain bashar ne jang kaa maidaan banaayaa hai inhein varna parinde mandir-o-masjid ko apnaa ghar samajhte hain junun-e-'ishq ke maaron ki khubi hai yahi 'gauhar' vo har bedaad-gar ko apnaa chaaraagar samajhte hain"

"tajdid-e-ltifaat kaa imkaan nahin rahaa aish-o-nishaat ziist kaa saamaan nahin rahaa ik ek kar ke dil ke sab armaan miT gae sad shukr dil mein ab koi armaan nahin rahaa fasl-e-bahaar aa ke bhi kyaa gul khilaaegi vo gul nahin rahe vo gulistaan nahin rahaa dene lagi hai maut mire dar pe dastakein ab zindagi kaa mujh pe kuchh ehsaan nahin rahaa hindu bhi apne dharm ke raste se haT gae imaan-parast koi musalmaan nahin rahaa detaa thaa jo hayaat-e-vafaa ko tasalliyaan vo gham bhi zindagi kaa nigahbaan nahin rahaa jiine kaa valvala hai na khaTkaa hai maut kaa ab imtiyaaz-e-saahil-o-tufaan nahin rahaa aisaa hai kaun jis ko hamesha khushi mili aisaa bhi koi hai jo pareshaan nahin rahaa 'gauhar' ye iztiraab-e-shab-o-roz hai fuzul kyaa eatibaar-e-rahmat-e-yazdaan nahin rahaa"

"jo farz aaed huaa hai ham par use khushi se adaa kareinge hamaaraa sheva yahi rahaa hai jafaa ke badle vafaa kareinge shikasta kashti muhib tufaan aur saahil nazar se ojhal azaab kitne hi aaein ham pe na minnat-e-naakhudaa kareinge rasaai kaise vafaa ki manzil pe hogi ye raaz ham se puchho jahaan safar khatm sab kaa hogaa vahin se ham ibtidaa kareinge khushi ke jhule hain jhulne vaale kyaa samajh paaein zindagi ko ye raaz un par khulegaa jis dam vo dil ko gham-aashnaa kareinge shajar hai be-barg kaliyaan raundi hui gul-o-laala hain fasurda yahi hai manzar bahaar kaa to chaman mein ham jaa ke kyaa kareinge rahe hain zaat-e-khudaa se munkir gunaah taslim hai magar ab hayaat ki sarzanish se Dar kar buland dast-e-duaa kareinge azal se dastur hai ye qaaem na is mein tarmim ho sakegi charaagh-haa-e-hayaat 'gauhar' jalaa kareinge bujhaa kareinge"

"vahi hai tarz-e-taghaaful vahi hai khu mujh mein utar gayaa ho vo jaise ki hu-ba-hu mujh mein main manzilon ko bhi ab rahguzar samajhtaa huun kahaan se umDaa hai ye shauq-e-justuju mujh mein rahegaa zindagi pe fakhr taa-dam-e-aakhir agar jhalakti rahi shaan-e-aabru mujh mein khushi yahi hai bil-aakhir kisi ke kaam aae bachaa huaa hai jo ik buund bhar lahu mujh mein agarche mai-kade mein jaa sakaa na muddat se basaa hai ab bhi magar shor-e-haa-o-hu mujh mein ye kis ke dam se charaaghaan hai meri bazm-e-khayaal ye kaun kartaa hai chhup-chhup ke guftugu mujh mein kisi tarah se miri bartari na ho paai khayaal-e-dost bhi ban kar rahaa adu mujh mein mujhe yaqin hai vo din zarur aaegaa ki jab main tujh mein samaaungaa aur tu mujh mein banaa hai marjaa-e-ahbaab ghar miraa 'gauhar' dar aai mehr-o-mohabbat ki jab se bu mujh mein"

"ik ajab rog mire ji ko lagaa barson se raas aai bhi nahin koi davaa barson se yuun to aane ko bahaar aai khizaan bhi aai dil ke maahaul ki badli na fazaa barson se mere hi dil ki ye khubi hai ki is mein yaaro raat-din hotaa hai hangaama bapaa barson se minnatein maangin davaa aur duaa bhi kar li ghuncha-e-dil kisi surat na khilaa barson se kisi naadaar ki turbat kaa hai tanhaa zaamin ek TuuTaa huaa khaamosh diyaa barson se kaun hai mere sivaa mahram-e-asraar-e-vafaa dil miraa soz-e-mohabbat mein jalaa barson se meraa andaaz-e-parastish hai zamaane se judaa main samajhtaa huun sanam hi ko khudaa barson se khvaab saa ho ke rahaa sheva-e-aadaab-o-salaam ab to aati hi nahin lab pe duaa barson se apni tasvir ko dekhaa to ye mahsus huaa aisaa ik shakhs mire saath rahaa barson se fard-e-isyaan pe miri daavar-e-mahshar ne likhaa is se sarzad na hui koi khataa barson se mauj-e-dariyaa kaa tarannum kabhi dilkash rim-jhim kaun hai in mein sadaa naghma-saraa barson se kuchh na kuchh is kaa bhi mafhum to hogaa 'gauhar' ghaib se aati hai kaanon mein sadaa barson se"

"qadam-qadam pe Thaharte the Dar hi aisaa thaa na tai huaa kabhi ham se safar hi aisaa thaa muhib saae se aate rahe nazar har-su ye zikr-e-dasht nahin apnaa ghar hi aisaa thaa na raas aae hain aish-o-nishaat ke lamhe nizaam-e-dahr kaa ham par asar hi aisaa thaa koi bhi aib phaTakne na paayaa paas apne hamaare paas tilism-e-hunar hi aisaa thaa hamein ye shauq ki tufaan ki mauj se khelein magar kinaare pe laayaa bhanvar hi aisaa thaa yahin se aati thiin har shab ajiib aavaazein nagar se duur puraanaa khanDar hi aisaa thaa andheri vaadiyaan bhi ham ko jagmagaati lagin hamaare paas charaagh-e-nazar hi aisaa thaa har ek shakhs yahaan thaa mukhauTaa pahne hue tamaam nagron mein apnaa nagar hi aisaa thaa bahaar aur khizaan ek se hain us ke liye hamaare baagh kaa tanhaa shajar hi aisaa thaa na kham huaa kisi jaabir ke ru-ba-ru 'gauhar' sadaa buland rahaa apnaa sar hi aisaa thaa"

"baat bigDi hui bani hai abhi ik nayaa rabt-e-baahami hai abhi mujh ko aisaa gumaan hotaa hai naa-mukammal si zindagi hai abhi baavajude hazaar naakaami zindagi mein hamaahami hai abhi ek bijli si hai jo rah rah kar gosha-e-dil mein kaundti hai abhi shauq se aao qaafile vaalo raah-e-manzil bulaa rahi hai abhi yuun to tum bhi udaas udaas se ho aankh meri bhi shabnami hai abhi zindagi ki talaash mein huun main zindagi mujh ko DhunDhti hai abhi nazriya ek saa nahin rahtaa aql aur dil mein dushmani hai abhi khaak Daalaa kiye adu har dam phir bhi urdu mein shustagi hai abhi tum ghazal ko nikhaar lo 'gauhar' chaand taaron mein raushni hai abhi"

"ham kufr se vaaqif hain na islaam se vaaqif hain mazhabi parkhaash ke anjaam se vaaqif taa-umr rahe hain jo mai-o-jaam se vaaqif ho paae na vo gardish-e-ayyaam se vaaqif tanvir-e-sahar jin ki nigaahon mein basi ho kab hote hain vo tirgi-e-shaam se vaaqif manzil pe pahunchnaa hamein dushvaar nahin hai ham hain ba-khudaa apne har ik gaam se vaaqif paikar mein har ik shakhs ke partav hai usi kaa har shakhs hai us hasti-e-be-naam se vaaqif tadbir ki khubi ise kahiye ki vafaa mein ham ho na sake hasrat-e-naakaam se vaaqif ho paae na vo azmat-e-hasti se shanaasaa jo ho na sake hain gham-o-aalaam se vaaqif vijdaan pe ik barq si lahraai thi 'gauhar' ho paae hamin haif na ilhaam se vaaqif"

"sar bhi bhaari hai dil bhi bhaari hai be-qaraari si be-qaraari hai aasmaan par sitaare hain raushan kaisi qudrat ki dast-kaari hai pyaas ne aaj kar diyaa saabit zaaiqa aansuon kaa khaari hai aap jis ko na sun sake ab tak bas vahi daastaan hamaari hai raat ke baa'd subh kaa aanaa silsila ye azal se jaari hai aaj-kal ke sharif-zaadon mein saaf goi na inkisaari hai aap hindi zabaan pe shaidaa hain ham ko urdu zabaan pyaari hai bhes badle hue na ho 'gauhar' aap ke dar pe jo bhikaari hai"

"hamein apne to kyaa ghairon ko Thukraanaa nahin aataa ravaadaari ki raahon se bhaTak jaanaa nahin aataa diyaa ummid kaa rahbar banaa letaa huun manzil tak mujhe raste ki taariki se ghabraanaa nahin aataa gulistaan-e-mohabbat mein kuchh aise phuul khilte hain jinhein mausam badalne par bhi murjhaanaa nahin aataa jahaan tak ho sake har haal mein ham shaad rahte hain vafur-e-yaas mein bhi ashk barsaanaa nahin aataa rah-e-manzil hamaari hausla-mandi se vaaqif hai hamein baDhnaa to aataa hai palaT aanaa nahin aataa khudaa-e-do-jahaan ne ye salaahiyyat hamein di hai kabhi makr-o-riyaa kaa jaal phailaanaa nahin aataa milaa sabr-o-qanaaat kaa asaasa maalik-e-kul se ye neamat hai hamein neamat pe itraanaa nahin aataa tahi-kaasa liye vaapas khanDar mein lauT aae hain hamein ehsaas-e-mahrumi ko bhaDkaanaa nahin aataa thapeDe yaas-o-gham ke khaae hain din-raat ai 'gauhar' magar ab tak fareb-e-aarzu khaanaa nahin aataa"