Ghazal

shaakh-e-gulshan pe thaa jo Thikaana gayaa

us parinde kaa to aab-o-daana gayaa

aandhiyon ki hai zad par gharaunde yahaan

yaani hamdardiyon kaa zamaana gayaa

· · ·

qaatil hai jo meraa vahi apnaa saa lage hai

duniyaa se judaa ho ke vo duniyaa saa lage hai

har shaam mire dil mein hai yaadon se charaaghaan

har shaam miri palkon pe melaa saa lage hai

· · ·

kal aaj se behtar ho aao ye duaa maangein

mansur-o-muzaffar ho aao ye duaa maangein

duniyaa ki fasilon par hon amn ki raanaai

ne khuun na khanjar ho aao ye duaa maangein

· · ·

tajalliyon se andheron ki jang jaari hai

ujaale surkh-ru hon ye du'aa hamaari hai

jahaan pe kal thaa gulistaan vo aaj maqtal hai

falak khamosh hai phir dekhein kis ki baari hai

· · ·

main duur ho ke bhi us se judaa nahin hotaa

hamaare biich koi faasla nahin hotaa

baghair us ke ho ehsaas-e-zindagi kaa safar

ye sochtaa to huun par hausla nahin hotaa

· · ·

duur baiThe hain kyuun paas to aaiye

vaqt ruktaa nahin yuun na sharmaaiye

zina-e-ishq bhi zinat-e-bait bhi

dil mein rakhiye qadam dil mein bas jaaiye

· · ·

taraqqi kaa vo daavaa kar rahaa hai

magar har shakhs faaqa kar rahaa hai

vo dekhe hai makaanaat-e-bulandi

vo ujDe ghar se parda kar rahaa hai

· · ·

khvaab us kaa to haqiqat se ziyaada hai bahut

meri uljhan bhi mohabbat se ziyaada hai bahut

us ki saanson se mahak uThte hain kitne hi gulaab

lams us kaa mujhe daulat se ziyaada hai bahut

· · ·