Ghazal

udaas raat kaa manzar hamaari aankh mein thaa

par ek khvaab baraabar hamaari aankh mein thaa

Tapak rahe the musalsal hi aankh se aansu

ye kis ki yaad kaa kankar hamaari aankh mein thaa

· · ·

bhiiD thi hadd-e-nazar tak kitnaa unchaa shor thaa

khaamushi bhi chaunk uThi thi achchhaa-khaasaa shor thaa

mujh ko aisaa lag rahaa thaa be-hisi ke daur mein

log saare mar gae the aur zinda shor thaa

· · ·

bhaTakne vaale ko aakhir kahin pe girnaa thaa

tumhaare dar pe giraa huun yahin pe girnaa thaa

havaa ke dosh pe kab tak fazaa mein rahte ham

kamaan se nikle huon ko zamin pe girnaa thaa

· · ·

phir raat ko mahtaab kaa gham chaaT rahaa hai

aur dil ko tire khvaab kaa gham chaaT rahaa hai

mahsus karo bol ke ab kaise bataae

machhli ko bahut aab kaa gham chaaT rahaa hai

· · ·

mire nasib mein yuun bhi ghami ziyaada hai

kisi khayaal ki mujh mein kami ziyaada hai

ye sard-mehri tiri mujh ko maar Daalegi

ye barf pahle ki nisbat jami ziyaada hai

· · ·

miraa yaqin mukammal gumaan se pahle thaa

miraa vujud kahin to yahaan se pahle thaa

vo ik maqaam jo jannat-misaal kahlaae

zamin ke baa'd magar aasmaan se pahle thaa

· · ·

tumhaare dhyaan mein rahnaa bahut zaruri hai

isi makaan mein rahnaa bahut zaruri hai

main jaantaa huun mujhe dil mein kaun rakkhegaa

miraa gumaan mein rahnaa bahut zaruri hai

· · ·

ye meri aankh kaa girya bataa rahaa hai mujhe

koi to hai jo abhi yaad aa rahaa hai mujhe

kisi ko kaise bataaun ki lamha-e-maujud

gae zamaanon ki baatein sunaa rahaa hai mujhe

· · ·

vo hamein zarb lagaate hue mar jaate hain

aur ham jaan se jaate hue mar jaate hain

zinda rahne ke liye saath zaruri hai tiraa

tujh ko ye baat bataate hue mar jaate hain

· · ·

khizaan ki rut mein shajar se kalaam karte hue

taDapne lagtaa huun aksar ye kaam karte hue

gale lagaanaa bhi jis ko main kam samajhtaa thaa

guzar gayaa huun ab us ko salaam karte hue

· · ·