Ghazal

dost jaagir chaahiye hai mujhe

teri tasvir chaahiye hai mujhe

'ishq vaali gali mayassar hai

tujh saa rahgir chaahiye hai mujhe

· · ·

un se yuun raabte nuzul paDe

raah mein jaa-ba-jaa the phuul paDe

kyaa kahaa 'ishq ke safar pe ho

gar ye sach hai to dost tuul paDe

· · ·

kuchh is tarah se bhi khud ko ab mo'tabar karungaa

main ranj uThaate hue charaaghon mein ghar karungaa

tumhaare bhige badan ki khushbu kaa haath thaame

ai 'ishq-zaadi main tum mein 'umron safar karungaa

· · ·

silsila-vaar ta'alluq ko nibhaate hue ham

tujh talak aa hi gae milte milaate hue ham

apni aankhon ko tire taaq mein chhoD aae hain

ai hasin shakhs tire khvaab se aate hue ham

· · ·

zindagi gyaan se nikalte hain

had-e-imkaan se nikalte hain

jab bhi izhaar-e-'ishq kartaa huun

lafz be-jaan se nikalte hain

· · ·

aane jaane kaa silsila kariye

aap bhi kuchh na kuchh kahaa kariye

mil bhi saktaa hai koi bichhDaa huaa

duur tak bas yunhi chalaa kariye

· · ·

dasht mein ashk bahaaein to sabhi sar rakkhein

kyon na mil kar yahaan buniyaad-e-samundar rakkhein

ham sabhi kaam mohabbat se liyaa karte hain

dost shamshir ko parde hi ke andar rakkhein

· · ·

pahle pahle miri du'aa huaa vo

phir du'aaon se maavaraa huaa vo

tu kabhi dekh din nikalte hue

hu-ba-hu jaise jaagtaa huaa vo

· · ·

harf aur saut ki jaagir pe aae hue hain

meraa matlab hai dar-e-'mir' pe aae hue hain

jis qadar ghaav lage hain tan-e-khasta pe mire

utne ilzaam bhi shamshir pe aae hue hain

· · ·

jab bhi us husn-e-naazuki se milun

ik 'ajab rang-e-raushni se milun

tu jo kah de to chhoD duun ye jahaan

tu jo kah de to har kisi se milun

· · ·

duniyaa vaalon ko tire khvaab jo aane lag jaaein

shaam hote hi sabhi khud ko sulaane lag jaaein

kyaa andheraa hi andheraa hai zamin ke andar

kyaa charaaghon ko tah-e-khaak dabaane lag jaaein

· · ·

sar pe dast-e-du'aa charaagh kaa hai

ye bhi ik mo'jiza charaagh kaa hai

ye jo raushan hain khaal-o-khad mere

mujh se ik raabta charaagh kaa hai

· · ·

ek dariyaa chhupaa ke ghar rakhnaa

kitnaa mushkil hai chashm-e-tar rakhnaa

pahli saf mein khaDe hue logo

aakhiri shakhs par nazar rakhnaa

· · ·

aap se baat kaa iraada kiyaa

'ishq se yuun bhi istifaada kiyaa

khaal-o-khad chaahiyein the so main ne

aap ke 'aks ko labaada kiyaa

· · ·

ye jo dikh rahaa huun main is qadar ujaalon mein

guftugu bahut ki hai aap se khayaalon mein

aap ke havaale se mujh ko yaad paDtaa hai

main kahaan kahaan pe thaa aap ke havaalon mein

· · ·

sirf saaya hi nahin paanv mein rakkhaa huaa hai

ek suraj bhi miri chhaanv mein rakkhaa huaa hai

ye alag baat ki main shahr-zada huun lekin

bachpanaa ab bhi miraa gaanv mein rakkhaa huaa hai

· · ·

aap mat kijiye yaqin saahab

'ishq mein fursatein nahin saahab

aakhir-e-kaar ek ho gae hain

'ishq dahliz aur jabin saahab

· · ·

nai mohabbat ki daastaanein raqam kareinge to ham kareinge

dilon mein baDhti hui khalijon ko kam kareinge to ham kareinge

ham apni nindon ki Doriyon tak ko tere pallu se baandh leinge

yuun apne khvaabon ko tere khvaabon mein zam kareinge to ham kareinge

· · ·

dhyaan mein laate hain yuun bhi tiri baaton ke charaagh

dekhnaa chaahte hain ham tiri raaton ke charaagh

'aam si shab ko shab-e-khaas banaa dete hain

ik tiri yaad mein jalti hui aankhon ke charaagh

· · ·

bhuul jaane kaa hunar to mujhe aataa hi nahin

is liye duur talak hijr se naata hi nahin

aise daalaan-kushaa ke dar-o-divaar pe khaak

jo tire jism ki khushbu mein nahaataa hi nahin

· · ·

yaqin kyunkar na karte ho

darun-e-dil dhaDakte ho

hamaaraa masala samjho

mohabbat ko samajhte ho

· · ·

charaagh-o-taaq mein bedaar ho gaiin aankhein

ba-faiz-e-'ishq samajh-daar ho gaiin aankhein

tumhaaraa 'aks utaaraa hai muddaton in mein

'ajab nahin hai jo tahdaar ho gaiin aankhein

· · ·

husn-e-jaanaan-e-mo'tabar us ko

lag na jaae kahin nazar us ko

ashk palkon pe khushk kartaa huun

bhej kar khvaab-e-mukhtasar us ko

· · ·

namaaz-e-'ishq paDhi hai abhi abhi tum ne

khudaa bhi dekhaa hai kyaa jism mein kabhi tum ne

main ab ke hijr mein mumkin hai kuchh sanvar jaaun

agar khayaal rakhaa yaar-e-ajnabi tum ne

· · ·