Ghazal

teri nigah se tujh ko khabar hai ki kyaa huaa

dil zindagi se baar-e-digar aashnaa huaa

ik ik qadam pe us ke huaa sajda-rez main

guzraa thaa jis jahaan ko kabhi raundtaa huaa

· · ·

kyon vahm saa rahtaa hai is hone na hone kaa

hote na to kyaa hote aur hote to kyaa hote

kal aayaa nazar juz mein taqsir ye thi kis ki

hotaa na khudaa banda bande na khudaa hote

· · ·

un ko dekh ke dil saa murakh jab saanche mein Dhal jaataa hai

meri bisaat to kyaa hai ik 'aalam par jaadu chal jaataa hai

apnaa fasaana yaa rudaad-e-zamaana kahte kab banti hai

aankhon mein aansu aate hain khuun kaa rang badal jaataa hai

· · ·

fareb-e-husn ki ghaatein hasin hain

mohabbat mein bhi kyaa baatein hasin hain

jamaayaa rang aisaa aansuon ne

samajhtaa huun ki barsaatein hasin hain

· · ·

ab chhoD tasavvur mein marnaa maidaan mein nikal aa jiine ko

tufaan ke siine par khenaa hai tujh ko apne safine ko

girton kaa sanbhalnaa khuub sahi lekin ye sanbhalne ko girnaa

hairat hai ki chaahaa kyon tu ne jiine ke aise qarine ko

· · ·

anjuman mein un ki dil par ikhtiyaar aasaan nahin

mushkilon kaa meri kar lenaa shumaar aasaan nahin

har nafas hai ek sharh-e-dard-haa-e-aarzu

daastaan-e-zindagi kaa ikhtisaar aasaan nahin

· · ·

suraj ki kiran kaa shoabada hai

rang-e-rukh-e-zard uD gayaa hai

naqsh-e-kaf-e-paa ne gul khilaae

viraan kahaan ab ye raasta hai

· · ·

maathe par Tiikaa sandal kaa ab dil ke kaaran rahtaa hai

mandir mein masjid banti hai masjid mein brahman rahtaa hai

zarre mein suraj aur suraj mein zarre raushan rahtaa hai

ab man mein saajan rahte hain aur saajan mein man rahtaa hai

· · ·

aap kyuun chheDte hain dipak raag

shahr mein lag rahi hai khud hi aag

uTh rahaa hai harim-e-dil se dhuaan

luT rahaa hai suhaaganon kaa suhaag

· · ·

vo kahaan mujh pe jafaa kartaa thaa

jo muqaddar thaa milaa kartaa thaa

aaj sharmaataa hai suraj us se

vo jo taaron se hayaa kartaa thaa

· · ·

chanaarein vaadiyon mein mushtail hain

dareghaa sarv abhi tak paa-ba-gil hain

uThe hain laala-e-khunin-kafan phir

yahi shoale jahaan-e-mustaqil hain

· · ·

dhundlaa diyaa ziist kaa tasavvur

apni aankhon hi ki nami ne

haivaan-sifat huaa hai aakhir

dikhlaayaa kamaal aadmi ne

· · ·

in ki jab nukta-vari yaad aai

apni hi be-khabari yaad aai

yaad aai bhi to yuun ahd-e-vafaa

aah ki be-asari yaad aai

· · ·

zer-e-zamin jo mujh ko havas aasmaan ki hai

shaayad ye musht-e-khaak tire aastaan ki hai

kartaa huun jam' be-sar-o-saamaaniyaan kahin

bijli ko phir talaash mire aashiyaan ki hai

· · ·

chaman-bandi pe hai mahshar bapaa kyaa

khile hain gul uDi hai khaak kyaa kyaa

shahidaan-e-vafaa bhi ji uTheinge

koi jaadu jagaa ab puchhnaa kyaa

· · ·