is qadar ehtimaam ho teraa — Misma Naaz

"sanbhal ke rahnaa baDaa kaThin hai na kuchh bhi kahnaa baDaa kaThin hai shafiq lahjon ke tez nashtar hanuz sahnaa baDaa kaThin hai kisi kinaare baghair kashti havaa se bahnaa baDaa kaThin hai libaas bhaari pe unchaa juutaa gulon kaa gahnaa baDaa kaThin hai hamaari yaadon mein 'naaz' us kaa udaas rahnaa baDaa kaThin hai"

"nainon mein tiraa 'aks sajaane ke liye hai tu pyaar-bhari nazm sunaane ke liye hai ji bhar ke tujhe dekhnaa phir dekhte rahnaa ye sab to faqat saans chalaane ke liye hai kis tarh se ham zer hue us ke sitam se ye baat yahaan sab ko bataane ke liye hai har baat pe inkaar hai har baat pe jhagDaa naazuk saa miraa dil ye jalaane ke liye hai"

"apnon kaa Dasaa maangtaa paani bhi nahin hai niklegi magar jaan ye jaani bhi nahin hai is daur-e-mohabbat mein huaa haal jo apnaa duniyaa mein to is haal kaa saani bhi nahin hai ristaa hai abhi tak mire zakhmon se miraa khuun ye choT dubaara mujhe khaani bhi nahin hai chup-chaap bhi rahnaa hai jataanaa bhi bahut hai par dil pe jo guzri hai sunaani bhi nahin hai dafnaai nahin jaaegi ai 'naaz' ye mujh se ye 'ishq ki hai laash uThaani bhi nahin hai"

"main ne pahlu mein use aise biThaa rakkhaa hai jis tarah chaand ko baanhon mein chhupaa rakkhaa hai dekh ke us pe 'inaayat ye sabhi kahte hain tu ne us ko to baDaa sar pe chaDhaa rakkhaa hai dilkashi kyon na nazar aae mire chehre par taaj chaahat kaa mire sar pe sajaa rakkhaa hai vo tabi'at kaa zaraa ek alag banda hai ek duniyaa se use main ne bachaa rakkhaa hai kyunkar aaegi ye poshaak miri sab ko pasand is mein to 'ishq kaa paivand lagaa rakkhaa hai 'naaz' kartaa thaa mire ghar mein jo jalne pe kabhi baam kaa vo bhi diyaa main ne bujhaa rakkhaa hai"

"us mulaaqaat ki vo ghaDi yaad hai tujh pe pahli nazar jo paDi yaad hai is taraf main thi aur us taraf tu khaDaa pichhe paTri pe gaaDi khaDi yaad hai tujh se milnaa thaa jis din mujhe jaan-e-jaan dhuup us din bahut thi kaDi yaad hai ek cafe ki kursi pe baiThi thi main mez par ek botal paDi yaad hai tu ne ungli ki poron se chumi kamar jis pe meri thi rangat uDi yaad hai tez-raftaar saansein thiin tham si gaiin lab se lab ki mili pankhuDi yaad hai"

"vo uljhe baal yuun suljhaa rahaa thaa miraa dil is adaa par aa rahaa thaa pahan rakkhaa thaa main ne surkh joDaa magar phir bhi ghazab vo Dhaa rahaa thaa surilaa is qadar lahja thaa us kaa havaa par giit likhtaa jaa rahaa thaa mohabbat ki vo kuchh man-maaniyaan thiin ki jis par chaand bhi sharmaa rahaa thaa adaa kuchh khaas hi thi 'naaz' us mein muqaabil husn ke itraa rahaa thaa"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"