"kyaa bataaun ai mere yaar mujhe 'ishq hai tujh se be-shumaar mujhe aatish-e-'ishq le ke baiThaa huun kyaa jalaaegi koi naar mujhe khud ko shaahon kaa shaah samjhungaa gar mile khaak-e-paa-e-yaar mujhe zulm ab intihaa ko pohnchaa hai kab 'ataa hogi zulfiqaar mujhe 'amn' jaaun to phir kahaan jaaun raas aayaa hai ku-e-yaar mujhe"
"qissa-e-zist mukhtasar hi nahin main kahaan huun koi khabar hi nahin thaa tujhi se miraa nigaar-e-zist baa'd tere main mo'tabar hi nahin teri vaabastagi kaa samra hai varna ye zaat par asar hi nahin ek lamhe mein pher de dil ko 'amn' aisi koi nazar hi nahin"
Amn Iqbal"sirf tasvir muskuraati hai varna dil mein bahut udaasi hai vaise dozakh miraa Thikaana thaa ye to un ki karam-navaazi hai shiddat-e-pyaas shukriya teraa karbalaa yaad to dilaati hai dard-e-jaanaan baDhaa mire maulaa dard-e-jaanaan mein kaamyaabi hai vo to main thaa jo uTh gayaa varna zindagi bojh kab uThaati hai"
Amn Iqbal"maal-o-zar hi tiraa sahaaraa hai ye to phir baa’is-e-khasaara hai bah rahaa hai vujud ashkon mein 'aafiyat se kahin guzaaraa hai ham bhi ho jaaeinge fanaa yaa-rab bas tire kun kaa ik ishaara hai kyon koi dekhe tujh ko hasrat se tu koi aasmaan kaa taaraa hai 'amn' saahab hamein bataaein bhi tiir kis ne jigar pe maaraa hai"
Amn Iqbal"dard-e-dil teri intihaa mujh ko le chali su-e-karbalaa mujh ko apni hasti mein kho gayaa huun main koi dikhlaae raasta mujh ko kyon rahun bakht par main afsurda jo likhaa thaa vahi milaa mujh ko aab-o-gil aur teraa kun maulaa yaad hai apni ibtidaa mujh ko"
Amn Iqbal"tiri taaid mein duniyaa khaDi hai miri aavaaz dab kar rah gai hai tujhe ham raasta batlaa rahe hain baDi dilchasp teri rahbari hai vahin par hai andheron ki hukumat ujaalon ki jahaan rassa-kashi hai vahaan par chaand hai koi yaqinan vahaan par chaandni hi chaandni hai"
Amn Iqbal"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"
Divyansh Rawat"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"
"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"
Abdullah Zreem"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"
"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"
Farooque Adil"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"
Ata Abidi