miri qindil-e-jaan jalti hai shab bhar — Abdussamad ’Tapish’

ab nishaana us ki apni zaat hai
laD rahaa hai ik anokhi jang vo

— Abdussamad ’Tapish’

kaun patthar uThaae
ye shajar be-samar hai

— Abdussamad ’Tapish’

use khilaunon se baDh kar hai fikr roTi ki
hamaare daur kaa bachcha janam se buDhaa hai

— Abdussamad ’Tapish’

koi column nahin hai haadson par
bachaa kar aaj kaa akhbaar rakhnaa

— Abdussamad ’Tapish’

un ke lab par miraa gila hi sahi
yaad karne kaa silsila to hai

— Abdussamad ’Tapish’

main ne jo kuchh bhi likkhaa hai
vo sab harf-e-aainda hai

— Abdussamad ’Tapish’

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri