khinch laai jaanib-e-dariyaa hamein bhi tishnagi — Abhinandan Pandey

nasl-e-aadam rafta rafta khud ko kar legi tabaah
itni sakhti se qayaamat pesh aaegi na puchh

— Abhinandan Pandey

darmiyaan jo jism kaa parda hai kaise hogaa chaak
maut kis tarkib se ham ko milaaegi na puchh

— Abhinandan Pandey

khud-kushi kaa faisla ye soch kar ham ne kiyaa
kaun kartaa zindagi kaa maut se achchhaa ilaaj

— Abhinandan Pandey

ghaur se dekhte rahne ki sazaa paai hai
teri tasvir in aankhon mein utar aai hai

— Abhinandan Pandey

savaal aa gae aankhon se chhin ke honTon par
hamein javaab na dene kaa faaeda to milaa

— Abhinandan Pandey

jab yahaan rahne ke sab asbaab yakjaa kar liye
tab khulaa mujh par ki main duniyaa kaa baashinda na thaa

— Abhinandan Pandey

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

ham ko is ki kyaa khabar gulshan kaa gulshan jal gayaa
ham to apnaa sirf apnaa aashiyaan dekhaa kiye

— Hasan Najmi Sikandarpuri