puchhtaa phirtaa huun main apnaa pata jangal se — Abid Malik

zakhm aur peD ne ik saath duaa maangi hai
dekhiye pahle yahaan kaun haraa hotaa hai

— Abid Malik

hazaar taane sunegaa khajil nahin hogaa
ye vo hujum hai jo mushtail nahin hogaa

— Abid Malik

falak se kaise miraa gham dikhaai degaa tujhe
kabhi zamin pe aa aur zamin se dekh mujhe

— Abid Malik

baDe sukun se afsurdagi mein rahtaa huun
main apne saamne vaali gali mein rahtaa huun

— Abid Malik

miyaan ye ishq to sab TuuT kar hi karte hain
kisi se hijr agar vaalihaana ho jaae

— Abid Malik

ye mohabbat koi anjaan si shai hoti thi
kyaa ye kam hai ki ise teri badaulat samjhe

— Abid Malik

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

gul kiyaa jis ne vo thaa aur magar
shama ne shikva havaaon se kiyaa

— Tilok Chand Kausar