tum mire iraadon ke Dolte sitaaron ko — Ahmad Nadeem Qasmi

umr bhar sang-zani karte rahe ahl-e-vatan
ye alag baat ki dafnaaeinge eazaaz ke saath

mire khudaa ne kiyaa thaa mujhe asir-e-bahisht
mire gunah ne rihaai mujhe dilaai hai

un kaa aanaa hashr se kuchh kam na thaa
aur jab palTe qayaamat Dhaa gae

bhari duniyaa mein faqat mujh se nigaahein na churaa
ishq par bas na chalegaa tiri daanaai kaa

saari duniyaa hamein pahchaanti hai
koi ham saa bhi na tanhaa hogaa

mar jaataa huun jab ye sochtaa huun
main tere baghair ji rahaa huun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

mire hamraah garche duur tak logon ki raunaq hai
magar jaise koi kam hai kabhi milne chale aao

vo nahin aaj-kal khafaa ham se
koi niklaa hai raasta shaayad