itni mahngaai hai marnaa bhi agar chaahun to — Ahsan Gulfam

shahr kaa shahr ye pichhe jo paDaa hai mere
tere divaane mein kuchh baat to hoti hogi

— Ahsan Gulfam

ye shaairi kaa takalluf badan pe achchhaa libaas
sab iltizaam usi ek be-vafaa ke liye

— Ahsan Gulfam

mujh ko daavaa nahin yusuf saa hasin hone kaa
phir bhi hai meraa zulekhaaon mein charchaa saahab

— Ahsan Gulfam

rahne ko apne paas koi chhat nahin magar
chiDiyon ke chahchahaane ko aangan banaa diyaa

— Ahsan Gulfam

ab kahaan miltaa hai aashiq koi sachchaa saahab
zakhm hi koi lagaa dein mujhe achchhaa saahab

— Ahsan Gulfam

kahne ko faqat ibn-e-ali ibn-e-ali hain
dekho to kahin jazba-e-haidar nahin miltaa

— Ahsan Gulfam

udaas aankhon se aansu nahin nikalte hain
ye motiyon ki tarah sipiyon mein palte hain

— Bashir Badr

kisi ke ek ishaare mein kis ko kyaa na milaa
bashar ko ziist mili maut ko bahaana milaa

— Fani Badayuni

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

— Muztar Khairabadi

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa

— Rashid Shahjahanpuri

allaah re zauq-e-dasht-navardi ki baad-e-marg
hilte hain khud-ba-khud mire andar kafan ke paanv

— Mirza Ghalib

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

— Siraj Aurangabadi