meri jannat tiri nigaah-e-karam — Aish Meeruthi

uThaane vaale hamein bazm se zaraa ye dekh
ki TuTtaa hai gharibon kaa aasraa kaise

— Aish Meeruthi

karun kis kaa gila kahte hue bhi sharm aati hai
raqib afsos apne hi puraane aashnaa nikle

— Aish Meeruthi

na milne par bhi use 'aish' pyaar kartaa huun
yuun unchaa kar diyaa meaar-e-zindagi main ne

— Aish Meeruthi

baDhti rahi nigaah bahakte rahe qadam
guzraa hai is tarah bhi zamaana shabaab kaa

— Aish Meeruthi

ye bhi koi zindagi mein zindagi hai ham-nafas
dil kahin hai ham kahin hain aur jaanaana kahin

— Aish Meeruthi

aankhon ko tamanna hai khaak-e-dar-e-jaanaan ki
khaak-e-dar-e-har-kucha iksir nahin hoti

— Aish Meeruthi