mahv-e-hairat huun kharaash-e-dast-e-gham ko dekh kar — Ajiz Matvi

aaghaaz-e-mohabbat mein 'aajiz' rukti na thi mauj-e-ashk-e-ravaan
anjaam ab in khushk aankhon se ik ashk nikalnaa mushkil hai

— Ajiz Matvi

hasratein aa aa ke jama ho rahi hain dil ke paas
kaarvaan goyaa pahunchne vaalaa hai manzil ke paas

— Ajiz Matvi

hotaa hai mahsus ye 'aajiz' shaayad us ne dastak di
tez havaa ke jhonke jab darvaaze se Takraate hain

— Ajiz Matvi

muntazir huun main kafan baandh ke sar se 'aajiz'
saamne se koi khanjar nahin aayaa ab tak

— Ajiz Matvi

insaan haadsaat se kitnaa qarib hai
tu bhi zaraa nikal ke kabhi apne ghar se dekh

— Ajiz Matvi

ek ham hain ham ne kashti Daal di gardaab mein
ek tum ho Darte ho aate hue saahil ke paas

— Ajiz Matvi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq