Thahar gayaa hai dil kaa jaanaa — Ajmal Siraj

ye bhi tai hai ki jo boeinge vo kaaTeinge yahaan
aur ye bhi ki jo khoeinge vahi paaeinge

— Ajmal Siraj

bas ek shaam kaa har shaam intizaar rahaa
magar vo shaam kisi shaam bhi nahin aai

— Ajmal Siraj

ab aap khud hi bataaein ye zindagi kyaa hai
karam bhi us ne kiye hain magar sitam jaise

— Ajmal Siraj

kyaa kahegaa kabhi milne bhi agar aaegaa vo
ab vafaadaari ki qasmein to nahin khaaegaa vo

— Ajmal Siraj

ye jo ham khoe khoe rahte hain
is mein kuchh dakhl hai tumhaaraa bhi

— Ajmal Siraj

main ne ai dil tujhe siine se lagaayaa huaa hai
aur tu hai ki miri jaan ko aayaa huaa hai

— Ajmal Siraj

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal