di us ne mujh ko jurm-e-mohabbat ki vo sazaa — Akhtar Muslimi

mire dil pe haath rakh kar mujhe dene vaale taskin
kahin dil ki dhaDkanon se tujhe choT aa na jaae

— Akhtar Muslimi

ek hi anjaam hai ai dost husn o ishq kaa
shama bhi bujhti hai parvaanon ke jal jaane ke baad

— Akhtar Muslimi

fareb-khurda hai itnaa ki mere dil ko abhi
tum aa chuke ho magar intizaar baaqi hai

— Akhtar Muslimi

mere kirdaar mein muzmar hai tumhaaraa kirdaar
dekh kar kyuun miri tasvir khafaa ho tum log

— Akhtar Muslimi

iqraar-e-mohabbat to baDi baat hai lekin
inkaar-e-mohabbat ki adaa aur hi kuchh hai

— Akhtar Muslimi

dehaat ke basne vaale to ikhlaas ke paikar hote hain
ai kaash nai tahzib ki rau shahron se na aati gaanv mein

— Akhtar Muslimi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey