had-e-imkaan se aage main jaanaa chaahtaa huun par — Alok Yadav

annyaae ne bhar di hai bahut aag dilon mein
lanka hi kahin is mein jo jal jaae to achchhaa

— Alok Yadav

mire liye hain musibat ye aaina-khaane
yahaan zamir miraa be-naqaab rahtaa hai

— Alok Yadav

dilkashi thi unsiyat thi yaa mohabbat yaa junun
sab maraahil tujh se jo mansub the achchhe lage

— Alok Yadav

nai naslon ke haathon mein bhi taabinda rahegaa
main mil jaaungaa miTTi mein qalam zinda rahegaa

— Alok Yadav

pyaar kaa donon pe aakhir jurm saabit ho gayaa
ye farishte aaj jannat se nikaale jaaeinge

— Alok Yadav

vaaiz safar to meraa bhi thaa ruuh ki taraf
par kyaa karun ki raah mein ye jism aa paDaa

— Alok Yadav

apni anaa ki aaj bhi taskin ham ne ki
ji bhar ke us ke husn ki tauhin ham ne ki

— Iqbal Sajid

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

— Shams Deobandi

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

ghurur bhi jo karun main to aajizi ho jaae
khudi mein lutf vo aae ki be-khudi ho jaae

— Riyaz Khairabadi