un ki khush-bu se mahakti hain hazaaron sadiyaan — Amn Iqbal

tere bas mein hai mo'tabar kar de
main huun qatra mujhe guhar kar de

— Amn Iqbal

dekhtaa roz hai vo mujh ko magar jaane kyon
chaand se apni koi baat nahin hoti hai

— Amn Iqbal

du'aa karo ki koi raah vasl ki nikle
tamaam 'umr muhaajir nahin raheinge ham

— Amn Iqbal

hijr kaa zakhm to ik pal mein bhi bhar saktaa hai
vo agar chaahein muqaddar bhi sanvar saktaa hai

— Amn Iqbal

log husn-o-adaa ke qaidi hain
aur ham rekhta ke qaidi hain

— Amn Iqbal

dekh kar tujh ko aaj barsi hain
ek muddat se khushk thiin aankhein

— Amn Iqbal

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq