miri tanhaai kaa aalam na puchho — Anjum Siddiqui

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui

fasl-e-gul aa gai hai ahl-e-junun
phir garebaan ko taar taar karein

— Anjum Siddiqui

ik tabassum hazaar-haa aansu
ibtidaa vo thi intihaa hai ye

— Anjum Siddiqui

aarzu ki ye sazaa hai ki zamaana hai khilaaf
un se milne ki khudaa jaane sazaa kyaa hogi

— Anjum Siddiqui

hijr ki lazzaton kaa kyaa kahnaa
vo na aaein miri duaa hai ye

— Anjum Siddiqui

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq