supurd-e-aab yuun hi to nahin kartaa huun khaak apni — Arshad Jamal Sarim

dekh ai meri zabun-haali pe hansne vaale
vaqt ki dhuup ne kis darja nikhaaraa mujh ko

— Arshad Jamal Sarim

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

— Arshad Jamal Sarim

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

— Arshad Jamal Sarim

vo ik lamha sazaa kaaTi gai thi jis ki khaatir
vo lamha to abhi ham ne guzaara hi nahin thaa

— Arshad Jamal Sarim

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

— Arshad Jamal Sarim

zindagi ham se tiri aankh-micholi kab tak
ik na ik roz kisi moD pe aa leinge tujhe

— Arshad Jamal Sarim

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

duur tak chhaae the baadal aur kahin saaya na thaa
is tarah barsaat kaa mausam kabhi aayaa na thaa

— Qateel Shifai