churaa ke laae hain kuchh log lafz ke moti — Atique Asar

masarrat aur gham donon ki koi had zaruri hai
kisi bhi ek shai kaa silsila achchhaa nahin lagtaa

— Atique Asar

qarib se na guzar intizaar baaqi rakh
qaraabaton kaa magar e'tibaar baaqi rakh

— Atique Asar

uThe jaate hain dida-var sabhi aahista aahista
ye duniyaa mo'tabar logon se khaali hoti jaati hai

— Atique Asar

vo baat mujh ko to dushnaam si lagi hai 'atiq'
tumhaaraa naam likhaa kis ne be-vafaaon mein

— Atique Asar

udaas aankhon se aansu nahin nikalte hain
ye motiyon ki tarah sipiyon mein palte hain

— Bashir Badr

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa

— Rashid Shahjahanpuri

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

— Siraj Aurangabadi

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

— Muztar Khairabadi

allaah re zauq-e-dasht-navardi ki baad-e-marg
hilte hain khud-ba-khud mire andar kafan ke paanv

— Mirza Ghalib

kisi ke ek ishaare mein kis ko kyaa na milaa
bashar ko ziist mili maut ko bahaana milaa

— Fani Badayuni