dil ne ham se ajab hi kaam liyaa — Babar Rehman Shah

kisi ke jaal mein aa kar main apnaa dil ganvaa baiThaa
mujhe thaa ishq qaatil se main apnaa sar kaTaa baiThaa

— Babar Rehman Shah

ai pari-zaad tere jaane par
ho gayaa khud se raabta meraa

— Babar Rehman Shah

thakan se chuur hai saaraa vajud ab meraa
main bojh itne ghamon kaa to Dho nahin saktaa

— Babar Rehman Shah

aatish-e-ishq jab jalaati hai
jal ke main nosh-e-jaam kartaa huun

— Babar Rehman Shah

muflisi ne jaa-ba-jaa luuTaa hamein
ab bachaa kuchh bhi nahin luTvaaein kyaa

— Babar Rehman Shah

dil se aakhir charaagh-e-vasl bujhaa
kyaa tamannaa ne intiqaam liyaa

— Babar Rehman Shah

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal