ham ki shoala bhi hain aur shabnam bhi — Baqi Siddiqui

is badalte hue zamaane mein
tere qisse bhi kuchh puraane lage

— Baqi Siddiqui

kuchh na paa kar bhi mutmain hain ham
ishq mein haath kyaa khazaane lage

— Baqi Siddiqui

yahi rasta hai ab yahi manzil
ab yahin dil kisi bahaane lage

— Baqi Siddiqui

rang-e-dil rang-e-nazar yaad aayaa
tere jalvon kaa asar yaad aayaa

— Baqi Siddiqui

ek hansti hui badli dekhi
ek jaltaa huaa ghar yaad aayaa

— Baqi Siddiqui

dosti khun-e-jigar chaahti hai
kaam mushkil hai to rasta dekho

— Baqi Siddiqui

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

ye sar-ba-mohr botalein hain jo sharaab ki
raatein hain un mein band hamaari shabaab ki

— Riyaz Khairabadi

shab ko aa kar vo phir gayaa haihaat
kyaa isi raat ham ko sonaa thaa

— Nazeer Akbar Abadi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal