ashk 'binaa' bikhar hi jaataa hai — Beena Goindi

kuchh to kam hote shab ke andhiyaare
dil kaa dipak jalaa liyaa hotaa

— Beena Goindi

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

— Siraj Aurangabadi

kisi ke ek ishaare mein kis ko kyaa na milaa
bashar ko ziist mili maut ko bahaana milaa

— Fani Badayuni

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa

— Rashid Shahjahanpuri

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

— Muztar Khairabadi

udaas aankhon se aansu nahin nikalte hain
ye motiyon ki tarah sipiyon mein palte hain

— Bashir Badr

allaah re zauq-e-dasht-navardi ki baad-e-marg
hilte hain khud-ba-khud mire andar kafan ke paanv

— Mirza Ghalib