majburiyon ko apni kahein kyaa kisi se ham — Bismil Azimabadi

na apne zabt ko rusvaa karo sataa ke mujhe
khudaa ke vaaste dekho na muskuraa ke mujhe

— Bismil Azimabadi

ek din vo din the rone pe hansaa karte the ham
ek ye din hain ki ab hansne pe ronaa aae hai

— Bismil Azimabadi

ik ghalat sajde se kyaa hotaa hai vaaiz kuchh na puchh
umr bhar ki sab riyaazat khaak mein mil jaae hai

— Bismil Azimabadi

ye zindagi bhi koi zindagi hui 'bismil'
na ro sake na kabhi hans sake Thikaane se

— Bismil Azimabadi

aazaadi ne baazu bhi salaamat nahin rakkhe
ai taaqat-e-parvaaz tujhe laaein kahaan se

— Bismil Azimabadi

kyaa karein jaam-o-subu haath pakaD lete hain
ji to kahtaa hai ki uTh jaaiye mai-khaane se

— Bismil Azimabadi

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye zindagi hai apni kabhi khush kabhi udaas
is kashmakash se mujh ko khudaayaa rihaai de

— Zebunnisaa Zaibii

aaina to 'aibon ki khabar detaa hai 'aasif'
khush-fahmi-e-insaan kaa magar koi kare kyaa

— Akhtar Asif

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

— Bekhud Dehlvi

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

kuchh aastinon ki majburiyaan bhi hoti hain
khushi se apni bhalaa saanp kaun paaltaa hai

— Meraj Naqvi