puraane patton ko jhaaD denaa nae-navelon ko raah denaa — Ehya Bhojpuri

nazar utaarti hain vaqt vaqt par meri
mili hain maaon ko binaaiyaan ajib-o-gharib

— Ehya Bhojpuri

miraa ghar jalaane vaale mujhe fikr hai tiri bhi
ki havaa kaa rukh jo badlaa tiraa ghar bhi jal na jaae

— Ehya Bhojpuri

yuun to laDaai-jhagDe ki aadat nahin mujhe
phir bhi ghalat kiyaa thaa garebaan chhoD kar

— Ehya Bhojpuri

sab hifaazat kar rahein hain mustaqil divaar ki
jab ki hamla ho rahaa hai mustaqil buniyaad par

— Ehya Bhojpuri

khud par kisi ko hansne kaa mauqa nahin diyaa
puchhaa kisi ne haal to cigarette jalaa liyaa

— Ehya Bhojpuri

milaa hai takht jo jamhuriyat mein bandar ko
to un se kyaa sabhi jangal ke sher Dar jaaein

— Ehya Bhojpuri

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

yuun to maujud apne ghar mein hai
aadmi mustaqil safar mein hai

— Saleem Amrohvi