mataa-e-barg-o-samar vahi hai shabaahat-e-rang-o-bu vahi hai — Ghulam Husain Sajid

ek khvaahish hai jo shaayad umr bhar puuri na ho
ek sapne se hamesha pyaar karnaa hai mujhe

— Ghulam Husain Sajid

is andhere mein charaagh-e-khvaab ki khvaahish nahin
ye bhi kyaa kam hai ki thoDi der so jaataa huun main

— Ghulam Husain Sajid

rukaa huun kis ke vahm mein mire gumaan mein nahin
charaagh jal rahaa hai aur koi makaan mein nahin

— Ghulam Husain Sajid

ham musaafir hain gard-e-safar hain magar ai shab-e-hijr ham koi bachche nahin
jo abhi aansuon mein nahaa kar gae aur abhi muskuraate palaT aaeinge

— Ghulam Husain Sajid

agar hai insaan kaa muqaddar khud apni miTTi kaa rizq honaa
to phir zamin par ye aasmaan kaa vajud kis qahr ke liye hai

— Ghulam Husain Sajid

kisi ki yaad se dil kaa andheraa aur baDhtaa hai
ye ghar mere sulagne se munavvar ho nahin saktaa

— Ghulam Husain Sajid

jhaankte raat ke garebaan se
ham ne sau aaftaab dekhe hain

— Salman Akhtar

shor din ko nahin sone detaa
shab ko sannaaTaa jagaa detaa hai

— Saifuddin Saif

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

bahut hasin raat hai magar tum to so rahe ho
nikal ke kamre se ik nazar chaandni to dekho

— Shariq Kaifi

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi

— Parveen Shakir

shab ko aa kar vo phir gayaa haihaat
kyaa isi raat ham ko sonaa thaa

— Nazeer Akbar Abadi