jo us taraf se ishaara kabhi kiyaa us ne — Ghulam Murtaza Rahi

dekhne sunne kaa maza jab hai
kuchh haqiqat ho kuchh fasaana ho

— Ghulam Murtaza Rahi

hisaar-e-jism miraa toD-phoD Daalegaa
zarur koi mujhe qaid se chhuDaa legaa

— Ghulam Murtaza Rahi

ab aur der na kar hashr barpaa karne mein
miri nazar tire didaar ko tarasti hai

— Ghulam Murtaza Rahi

chale the jis ki taraf vo nishaan khatm huaa
safar adhuraa rahaa aasmaan khatm huaa

— Ghulam Murtaza Rahi

har ek saans mujhe khinchti hai us ki taraf
ye kaun mere liye be-qaraar rahtaa hai

— Ghulam Murtaza Rahi

sahraa jangal saagar parbat
in se hi rasta miltaa hai

— Ghulam Murtaza Rahi

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

— Nazeer Akbar Abadi

dil ki lahron kaa tul-o-arz na puchh
kabhu dariyaa kabhu safinaa hai

— Shaikh Zahuruddin Hatim

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

— Agha Hajju Sharaf

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

— Kausar Mazhari

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

— Farhat Ehsas

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi