khvaab mein chumaa thaa tum ne aur tab se aaj tak — Gyanendra Vikram

piyaala zahr kaa laae ho piine kyon nahin dete
mire marne pe ronaa hai to jiine kyon nahin dete

— Gyanendra Vikram

vasl ke do-chaar lamhe roz gin gin dekhnaa
rah gayaa thaa zindagi mein kyaa yahi din dekhnaa

— Gyanendra Vikram

chaar divaarein tamaasha dekhti hain roz raat
naachti hai zindagi aur taaktaa rahtaa huun main

— Gyanendra Vikram

din-ba-din rog ye baDhtaa hi chalaa jaataa hai
din-ba-din tu miri buniyaad hui jaati hai

— Gyanendra Vikram

tere kaandhe pe mohabbat kaa Tikaa hai parcham
jaan be-shak na rahe haar na hone paae

— Gyanendra Vikram

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi