mard-e-darvesh huun takiya hai tavakkul meraa — Haidar Ali Aatish

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

main us gulshan kaa bulbul huun bahaar aane nahin paati
ki sayyaad aan kar meraa gulistaan mol lete hain

— Haidar Ali Aatish

ajab teri hai ai mahbub surat
nazar se gir gae sab khubsurat

— Haidar Ali Aatish

us gul-badan ki bu-e-badan kuchh na puchhiye
band-e-qabaa jo khol diye ghar mahak gayaa

— Haidar Ali Aatish

uTh gai hain saamne se kaisi kaisi suratein
roiye kis ke liye kis kis kaa maatam kijiye

— Haidar Ali Aatish

ye aarzu thi tujhe gul ke ru-ba-ru karte
ham aur bulbul-e-betaab guftugu karte

— Haidar Ali Aatish

aur agar chaahe ki ho 'khvaah-makhvaah' shohrat teri
yusufi gar nahin mumkin to zulekhaai kar

— Ghaus Khah Makhah Hyderabadi

marne ke liye aae the ham dasht-e-balaa mein
jiine ki du'aa de gayaa darvesh hamein kyon

— Aafreen Faheem Aafi

faqir-e-shahr bhi rahaa huun 'shahryaar' bhi magar
jo itminaan faqr mein hai taaj-o-takht mein nahin

— Ahmad Shahryar

ek aalim hai jo sajdon mein gila kartaa hai
ek darvesh hai jo haalaat-e-namnaak mein khush

— Aisha Ayub

kabhi darvesh ke takiya mein bhi aa kar dekho
tang-dasti mein bhi aaraam mayassar niklaa

— Anees Ansari

nigaah chaahiye bas ahl-e-dil faqiron ki
buraa bhi dekhun to mujh ko bhalaa nazar aae

— Anis Dehlavi