jab se tumhaare diid ki chaahat nikal gai — Haider Allahabadi

itni jaldi nahin bichhaDnaa thaa
jitni jaldi bichhaD gai ho tum

— Haider Allahabadi

apne bistar pe dam na toD dein ham
teri baaton ko yaad kar kar ke

— Haider Allahabadi

us ne kaisaa ye kaam kar Daalaa
meraa jiinaa haraam kar Daalaa

— Haider Allahabadi

teraa chehra to dekh rakkhaa hai
had hai teri jabin nahin dekhi

— Haider Allahabadi

kyon miraa intizaar karte ho
kis liye mujh se pyaar karte ho

— Haider Allahabadi

chhat pe aai ho aaj barson baad
dekh kar chaand Dar na jaae kahin

— Haider Allahabadi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki