us ke rukhsaar pe hai aur tire honT pe til — Inayat Ali Khan

mafaad-e-qaum se naa-aashnaa kirdaar se aari
ye be-peindi ke loTe hain jidhar chaahein luDhak jaaein

— Inayat Ali Khan

phir to tum sar pe uThaa loge zamaane-bhar ko
sar uThaane ki ijaazat nahin di jaaegi

— Inayat Ali Khan

haadse se baDaa saaneha ye huaa
koi Thahraa nahin haadsa dekh kar

— Inayat Ali Khan

vo close-up to kisi bhi incloser mein na thaa
apne TV par jo ham ho kar magan dekhaa kiye

— Inayat Ali Khan

ye ho saktaa nahin kyuun paas aakhir
miraa beTaa shariat bill nahin hai

— Inayat Ali Khan

yahaan 'inaayat' aap ko mushaaeron ki daad ne
chaDhaa diyaa hai baans par mazaaq hi mazaaq mein

— Inayat Ali Khan

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

— Allama Iqbal

be-ilm shaairon kaa gila kyaa hai ai 'munir'
hai ahl-e-ilm ko tiraa tarz-e-bayaan pasand

— Muneer Shikohabadi

gulaabon ke honTon pe lab rakh rahaa huun
use der tak sochnaa chaahtaa huun

— Zubair Rizvi

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

— Abdul Wahab Sukhan