chalte rahe ham tund havaaon ke muqaabil — Jagan Nath Azad

main dil mein un ki yaad ke tufaan ko paal kar
laayaa huun ek mauj-e-taghazzul nikaal kar

— Jagan Nath Azad

DhunDhne par bhi na miltaa thaa mujhe apnaa vajud
main talaash-e-dost mein yuun be-nishaan thaa dosto

— Jagan Nath Azad

allaah re be-khudi ki tire ghar ke aas-paas
har dar pe di sadaa tire dar ke khayaal mein

— Jagan Nath Azad

ibtidaa ye thi ki main thaa aur daavaa ilm kaa
intihaa ye hai ki is daave pe sharmaayaa bahut

— Jagan Nath Azad

sukun-e-dil jahaan-e-besh-o-kam mein DhunDne vaale
yahaan har chiiz milti hai sukun-e-dil nahin miltaa

— Jagan Nath Azad

niind kyaa hai zaraa si der ki maut
maut kyaa kyaa hai tamaam umr ki niind

— Jagan Nath Azad

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar