mustaqil boltaa hi rahtaa huun — Jaun Elia

chaand ne taan li hai chaadar-e-abr
ab vo kapDe badal rahi hogi

— Jaun Elia

aaj bahut din baa'd main apne kamre tak aa niklaa thaa
juun hi darvaaza kholaa hai us ki khushbu aai hai

— Jaun Elia

shishe ke is taraf se main sab ko tak rahaa huun
marne ki bhi kisi ko fursat nahin hai mujh mein

— Jaun Elia

main ab har shakhs se uktaa chukaa huun
faqat kuchh dost hain aur dost bhi kyaa

— Jaun Elia

vo jo na aane vaalaa hai naa us se mujh ko matlab thaa
aane vaalon se kyaa matlab aate hain aate honge

— Jaun Elia

ek hi to havas rahi hai hamein
apni haalat tabaah ki jaae

— Jaun Elia

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

yaa kahte the kuchh kahte jab us ne kahaa kahiye
to chup hain ki kyaa kahiye khulti hai zabaan koi

— Fani Badayuni

asar bhi le rahaa huun teri chup kaa
tujhe qaail bhi kartaa jaa rahaa huun

— Firaq Gorakhpuri

chupke chupke uTh rahaa hai madh-bhare sinon mein dard
dhime dhime chal rahi hain ishq ki purvaaiyaan

— Firaq Gorakhpuri

main chup karaataa huun har shab umaDti baarish ko
magar ye roz gai baat chheD deti hai

— Gulzar