sab kaa khushi se faasla ek qadam hai — Javed Akhtar

agar palak pe hai moti to ye nahin kaafi
hunar bhi chaahiye alfaaz mein pirone kaa

— Javed Akhtar

yahi haalaat ibtidaa se rahe
log ham se khafaa khafaa se rahe

— Javed Akhtar

hai paash paash magar phir bhi muskuraataa hai
vo chehra jaise ho TuuTe hue khilaune kaa

— Javed Akhtar

tab ham donon vaqt churaa kar laate the
ab milte hain jab bhi fursat hoti hai

— Javed Akhtar

main paa sakaa na kabhi is khalish se chhuTkaaraa
vo mujh se jiit bhi saktaa thaa jaane kyuun haaraa

— Javed Akhtar

isi jagah isi din to huaa thaa ye elaan
andhere haar gae zindabaad hindostaan

— Javed Akhtar

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

aaina to 'aibon ki khabar detaa hai 'aasif'
khush-fahmi-e-insaan kaa magar koi kare kyaa

— Akhtar Asif

tum aake lauT gae phir bhi ho yahin maujud
tumhaare jism ki khushbu mire makaan mein hai

— Abbas Dana

nahin nahin main bahut khush rahaa huun tere baghair
yaqin kar ki ye haalat abhi abhi hui hai

— Irfan Sattar