thoDaa saa kahin jama bhi rakh dard kaa paani — Javed Shaheen

kis tarah be-mauj aur khaali ravaani se huaa
be-khabar dariyaa kahaan par apne paani se huaa

— Javed Shaheen

samajh rahaa hai zamaana riyaa ke pichhe huun
main ek aur tarah se khudaa ke pichhe huun

— Javed Shaheen

Dubne vaalaa thaa din shaam thi hone vaali
yuun lagaa miri koi chiiz thi khone vaali

— Javed Shaheen

kuchh zamaane ki ravish ne sakht mujh ko kar diyaa
aur kuchh bedard main us ko bhulaane se huaa

— Javed Shaheen

hisaab-e-dostaan karne hi se maalum ye hogaa
khasaare mein huun yaa ab main khasaare se nikal aayaa

— Javed Shaheen

judaa thi baam se divaar dar akelaa thaa
makin the khud mein magan aur ghar akelaa thaa

— Javed Shaheen

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

intihaa ke qarib hai duniyaa
aadmi aakhiri sadi kaa huun

— Zubair Khayali

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif