dard ki aanch banaa deti hai dil ko iksir — Javed Vashisht

aaj apne bhi paraae se nazar aate hain
pyaar ki rasm zamaane se uThi jaati hai

— Javed Vashisht

muddat se rahi farsh tiri raahguzar mein
tab jaa ke sitaaron se kahin aankh laDi hai

— Javed Vashisht

kaanTon pe chale hain to kahin phuul khile hain
phulon se mile hain to baDi choT lagi hai

— Javed Vashisht

ye to vaqt vaqt ki baat hai hamein un se koi gila nahin
vo hon aaj ham se khafaa khafaa kabhu ham se un ko bhi pyaar thaa

— Javed Vashisht

gham se ehsaas kaa aaina jilaa paataa hai
aur gham sikhe hai aa kar ye saliqa mujh se

— Javed Vashisht

aankh uThaao to hijaabaat kaa ik aalam hai
dil se dekho to koi raah mein haail bhi nahin

— Javed Vashisht

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi