ab miraa dhyaan kahin aur chalaa jaataa hai — Jawad Sheikh

apni taaid pe khud aql bhi hairaan hui
dil ne aise mire khvaabon ki himaayat ki hai

— Jawad Sheikh

kar kuchh aisaa ki tujhe yaad rakhun
bhuul jaane kaa taqaazaa hi sahi

— Jawad Sheikh

main is khayaal se jaate hue use na milaa
ki rok lein na kahin saamne khaDe aansu

— Jawad Sheikh

apne saamaan ko baandhe hue is soch mein huun
jo kahin ke nahin rahte vo kahaan jaate hain

— Jawad Sheikh

kyaa hai jo ho gayaa huun main thoDaa bahut kharaab
thoDaa bahut kharaab to honaa bhi chaahiye

— Jawad Sheikh

kaise kisi ki yaad hamein zinda rakhti hai
ek khayaal sahaaraa kaise ho saktaa hai

— Jawad Sheikh

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

— Allama Iqbal

sunaa hai vo mire baare mein sochtaa hai bahut
khabar to hai hi magar mo'tabar zyaada nahin

— Zafar Iqbal

maango samundaron se na saahil ki bhiik tum
haan fikr o fan ke vaaste gahraai maang lo

— Hasan Najmi Sikandarpuri

us ke rukhsaar pe hai aur tire honT pe til
tilmilaane ki ijaazat nahin di jaaegi

— Inayat Ali Khan