saare to nahin jaan bachaane mein lage hain — Junaid Akhtar

tum ko sote mein bhi kab aankh uThaa kar dekhaa
ham ne khvaabon mein bhi aaankhon ki nigah-daari ki

— Junaid Akhtar

raah-e-talab mein daam-o-diram chhoD jaaeinge
likh lo hamaare sher baDe kaam aaeinge

— Junaid Akhtar

rakhte hain mohabbat ko taghaaful mein chhupaa kar
parvaa hi to karte hain jo parvaa nahin karte

— Junaid Akhtar

vo to bas jhuTi tasalli ko kahaa thaa tum se
ham to apne bhi nahin, khaak tumhaare hote

— Junaid Akhtar

main bhalaa haath duaaon ko uThaataa kaise
us ne chhoDi hi nahin koi zarurat baaqi

— Junaid Akhtar

yaqin khud uTh gayaa hai mujh se meraa
miri itni taraf-daari hui hai

— Junaid Akhtar

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

— Mir Taqi Mir

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

— Ahmad Faraz