us ki aankhon mein utar jaane ko ji chaahtaa hai — Kafeel Aazar Amrohvi

tum ko maahaul se ho jaaegi nafrat 'aazar'
itne nazdik se dekhaa na karo yaaron ko

— Kafeel Aazar Amrohvi

koi manzil nahin milti to Thahar jaate hain
ashk aankhon mein musaafir ki tarah aate hain

— Kafeel Aazar Amrohvi

jaate jaate ye nishaani de gayaa
vo miri aaankhon mein paani de gayaa

— Kafeel Aazar Amrohvi

ek ik baat mein sachchaai hai us ki lekin
apne vaadon se mukar jaane ko ji chaahtaa hai

— Kafeel Aazar Amrohvi

baat niklegi to phir duur talak jaaegi
log be-vajh udaasi kaa sabab puchheinge

— Kafeel Aazar Amrohvi

jab se ik khvaab ki taabir mili hai mujh ko
main har ik khvaab ki taabir se ghabraataa huun

— Kafeel Aazar Amrohvi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

maarka garm to ho lene do khun-rezi kaa
pahle shamshir ke niche hamin jaa baiTheinge

— Mir Taqi Mir

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

mar gae pyaas ke maare to uThaa abr-e-karam
bujh gai bazm to ab shama jalaataa kyaa hai

— Ahmad Faraz