kai logon ne phalte phulte peDon se jaanaa hai — Kaleem Haider Sharar

ab is ko zindagi kahiye ki ahd-e-be-hisi kahiye
gharon mein log rote hain magar raston pe hanste hain

— Kaleem Haider Sharar

siskiyaan bhar ke 'sharar' kaun vahaan rotaa thaa
khema-e-khvaab sar-e-shaam jahaan par TuuTaa

— Kaleem Haider Sharar

apne darvaaze pe baiThaa sochtaa rahtaa huun main
meraa ghar ajdaad ki baara-dari kaa karb hai

— Kaleem Haider Sharar

yahaan pe dasht o samundar ki baat mat karnaa
hamaare shahr kaa har shakhs hai makaan-zada

— Kaleem Haider Sharar

haqiqat hai ise maanein na maanein ghaTti baDhti hain
vo jhuTi hon ki sachchi daastaanein ghaTti baDhti hain

— Kaleem Haider Sharar

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

apni anaa ki aaj bhi taskin ham ne ki
ji bhar ke us ke husn ki tauhin ham ne ki

— Iqbal Sajid

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

— Shams Deobandi

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

ghurur bhi jo karun main to aajizi ho jaae
khudi mein lutf vo aae ki be-khudi ho jaae

— Riyaz Khairabadi